Kar kalta Zirtawpni October ni 5 khan Pu P.L. Thanga, Vice-Chairman, NLUP Implementing Board, kaihhruainain NLUP Marketing Cell leh Horticulture Department hotute chuan NLUP leh RKVY hmanga Sapthei uar zawka chin dan tur an rel.

India ram hmun tam zawkah sapthei hi a chin hleih theih lova, Mizoramah erawh chuan sapthei hi a that duh avang leh sum chang thlai hlawhtling tak a nih theih hriain uar leh zuala chin an rel a ni. A bul tan nan khaw 28-ah sapthei chin lama tui tak tak tur chhungkaw 2000 thlan nise tih a ni a. Chung sapthei chinna tur khaw thlanchhuah te chu : Baktawng, Chamring, Chawilung, Chawngtlai, Chhiahtlang, Chhingchhip, Daido, Hmuntha, Hualtu, Khawhai, Khawlian, Khumtung, Lamherh, Maubuang, NE Tlangnuam, N.Khawlek, Pawlrang, Phuaibuang, Phulmawi,  Sialsuk, Suangpuilawn, Thentlang, Thiak, Tinghmun, Tualte, Vaitin, Vanbawng leh Zawngin te an ni.