NLUP tanpuina sem chhunzawm tura line department hrang hrang te sum mamawh dan leh beneficiary titha lo te enzui dan tur chungchangah vawiin khan NLUP Implementing Board Chairman Pu J.H.Rothuama hovin NIB conference hall-ah line department te an thu khawm.

He meeting ah hian line department hrang hrang ten NLUP tanpuina an pek chhuah tawh chin leh department kuta sum la awm zat te, sorkar sum bawm K deposit-a sum an neih zat te leh tanpuina sem chhunzawm tura October leh November chhunga an sum mamawh zat te report pe in heng atan hian ruahmanna siam dan tur an sawi ho a. Line department thenkhat chuan 2nd phase hi zo fel tawhin 3rd leh 4th phase kalpui tura an inbuatsaih mek laiin department tam ber chuan NLUP 2nd phase hi sorkar kum thar hmaa zawhfel theih an in beisei a. Chung zingah chuan Sericulture leh Soil & Water Conservation department te chuan 2nd phase sum hi pe chhuak mai turin an inpeih a, beneficiary hma la tha te chuan kumin Krismas hma in tanpuina an dawng hman vek dawn a ni.

Hetih rual hian beneficiary hma la tha lo enkawl dan tur chungchang pawh ngun taka ngaihtuah a ni a. Beneficiary beisei awm lo te chu thla 3 chhung hun pek a, chuta hma la la lo te chu tanpuina pek chhunzawm tawh lo turin line department te chu hriattir nawn leh an ni a. District tinah beneficiary te hmalakna endik a, monitoring hna ah mawhphurhna la turin line department te chu tih an ni a, a tul anga Village council leh VLMC te puibawmna la tura tih an ni. One village one crop kalpui turin district hrang hrang te dinhmun thlir hova thutlukna siam nghal turin November ni 12 hian District tina NLUP Nodal officer te ko khawmin NIB Chairman hova hemi chungchang hi ngaihtuah ho tura tih a ni bawk.

NIB Chairman Pu J.H.Rothuama chuan NLUP hlawhtling taka kalpui turin line department te chu nasa lehzuala tan la turin a sawm a ni.