Champhai South Bialtu MLA leh NLUP Implementing Board (NIB) Chairman nibawk Pu J.H. Rothuama chuan ni 18-22 February, 2014 khan a bial mipuite tlawhin, NLUP hmalakna hrang hrang a hmunah a tlawh.
Tupui, Chhungte, Dinthar, Kanan, Tlangsam, Dilkawn, Kelkang, Melbuk, Zokhawthar, Ruantlang, Zion Veng, Bethel Veng, Vengthar, Venglai leh Electric Veng te a tlawhna ah hian a nupui Pi Denghmingliani, Pu P.L. Thanga, Vice-Chairman (NIB) leh Pu David L. Thangliana, Chief Media Officer (NIB/I&PR) leh Media Team of NLUP ten an tawiawma, mipuiin an lo lawm nasa hle a, ran chi hrang hrang- Bawng-4, Vawk-4, Kel leh Ar te nen ropui takin lawmna ruai an lo siam sak a ni.
Pu Rothuama chuan a bial mipuite hnenah Chief Minister-in mipui hnaihah awm turin a tih avangin mipui nawlpui hnaih thei ang ber, NLUP Implementing Board-ah Chairman hna a pe chu lawmawm a tih thu sawiin, mirethei leh kuthnathawktute khiachhuahna tur programme pawimawh ber a dah a ni chu chona ropui a ni tiin, theih tawp chhuah a tum thu a sawi.
NIB Chairman chuan Chief Minister-in thahnemngai taka a sualchhuah NLUP sum chu dik taka hman a nih theihnan a dawngtute chuan rinawmna leh taimakna nen an thawh a tul dawn tih sawiin thawktha duhlote chu Congress Party mi pawh nise, dimdawina awm lovin, pek chhunzawm an ni dawn tawhlo tih a hrilh a ni. State dangte pawhin an dil ve mek, Mizoram-ah enchhin phawt a nih tur thu Central Sorkar-in an lo hrilh thin ah hian NLUP dawngtute leh sorkar lama mawhphurtu department te pawh in rinawm leh taimak an chhuah a ngai a ni, a ti bawk.
Pu P.L. Thanga, Vice-Chairman, NIB pawhin atan mirethei leh kuthnathawktute khai chhuahna NLUP atana mi thahnemngai Chairman-ah pek an ni chu lawmawm tiin, dawng tawh te hmalakna endik tur leh Lines Department te hnathawh leh harsatna hrang hrangte enturin feh chhuah tam a pawimawh tih sawiin, Mizoram media hrang hrang ten anlo puih thinna ah lawmthu a sawi.
Pu Rothuama hian NLUP hmalakna a hmuna tlawh programme Kolasib, Mamit leh Champhai District an kal tawhna a, hnathawktute hmalakna ah hlawhtlinna tamtak hmuh theih a awm tawh chu lawmawm a ti a, District dang zawngah pawh he programme hi kalpui zel a nih tur thu a sawi a ni.
