NLUP Phase-I a vawkvulh thlangtu te hnena tanpuina pek chhunzawm dan tur chungchang ah vawiin khan AH&Vety officer ten NLUP Implementing Board Vice Chairman Pu P.L Thanga hovin NLUP Conference Hall-ah meeting an nei a. Vawkte sem bak 32,076 chu kumin October thla chhung ngeia sem chhuak vek turin hma lak tum a ni.

NLUP hnuaia vawkvulh thlangtu chhungkaw 5346 hnenah vawk 2 theuh pek a ni tawh a. Hei hi a pui chi thlah tur atana tih a ni. A belh chhahna tur vawk 6 dang chu October thla chhunga sem chhuah theih beisei a niin hei vang hian vawk 8 leng tura vawk in zauhna tur tanpuina chu a rang thei ang bera sem chhuah tum a ni bawk.

Vawk note chi tha heti zat sem tur hian district tinah Vety department chuan field survey a nei hmasa a. Heta tang hian vawkpui 4857 leh vawkla 261, a vaiin 5118 vel awm anga chhut a ni a. Vawk no neih dan pangngai atanga chhutin kumin chhung hian vawk note  chi tha 40,000 chuang awm thei tura beisei a ni. Nikum a lo rel tawh angin NLUP beneficiary zingah mahni vawkpui hrin ringa vawk note vulh tur intodelh theite chu sum faia pek an ni ang.

Vawiin a meeting ah chuan Phase II a beneficiary te sum pek dan tur chungchang pawh ngaihtuah tel a ni a. Sum harsatna a awm loh avangin chak taka kalpui turin ruahmanna siam ni se tih a ni a. Hemi rual hian bawnglian vulh chungchangah harsatna sukiang tura remruatna thar siam fel hma chuan bawnglian vulh tur beneficiary thar thlan ni rih lo se, tia rel a ni.