4284/2025-2026

Dated Serchhip, the 4th February, 2026: Nasha Mukht Bharat Abhiyan (NMBA) Serchhip hmalakna kal zelah District pum huap Ruihhlo Ngaite Pual Camping neih a ni dawn a. Hemi chungchangah hian vawiin khan Serchhip DC Meeting Hall-ah member te thutkhawm pawimawh neih niin, Press mite kawmna neih chhunzawm nghal a ni.

Vawiin meeting ah hian Camping neih tur chungchanga inbuatsaihna te thlirho niin Sub Committee peng hrang hrang te inpuahchahna report ngaihthlak a ni a. Additional DC Pu Lalrinzuala chuan powerpoint hmangin inbuatsaihna kalpui dan a sawi a ni.

Camping neih chhung hian Doctor, Nurse leh pharmacist ten campers te an vil reng dawn a. Damdawi leh zu lama harsatna nei te hi a hmunah Medical Team te hian damdawi tha te nen inbuatsaihin an enkawl dawn a ni.

VC leh YMA hmalakna te ngaihthlak niin VC thenkhat chuan anmahni sum sengin camp a lut turte a hmun thleng an hruai tur thu leh campers te mamawh zual phuhruk sak an tum thu ngaihthlak a ni a. Committee chuan lawmthu sawiin, VC te leh tlawmngai pawl te, kohhran leh mimal thahnemngaite hemi kawngah hian penchhuak zel turin a sawm a ni.

Camping atana sum leh tha thawhtu mi thahnemngai tam tak an awm mek a. Kohhran hrang hrang 44 atangin sum ₹3,11,000 a lut tawh a. Mimal thahnemngai te atangin ₹4,30,000 a lut tawh a. Bialtu MLA Pu Lalduhoma, Mizoram Chief Minister chuan ₹2,50,000 zet a thawh a. Chutiangin, sum leh pai thawh remchang theilo te pawhin camping chhunga ei leh in tur, chawhmeh te, a tha ang zawng te pawha thawha, he camping atana inpek tum mi engemawzat an awm bawk a. DC Pu Paul L Khuma chuan he camping atana kohhran, tlawmngai pawl, sawrkar department leh mimal, tha leh sum thawhtu zawng zawngte chungah lawmthu sawiin; an theihna zawn apianga thlawp zel turin Serchhip District mipuite a sawm a ni.

Meeting neih zawh hian press mite kawmna hun neih chhunzawm a ni a. Organising Chairman kaihhruaina hnuaiah Serchhip District MJA te chuan Camping neihna hmun tur New Serchhip Biak In an tlawh bawk a ni.

NMBA hi Drug free India Campaign niin Sorkar lakpui Ministry of Social Justice and Empowerment hnuaia hmalakna a ni a. He hmalakna in a tum (focus) chu Demand Reduction niin, a ti mek ten an sim theihna tur leh a la ti ngai lo tên an tih chhin lohna tura tan lak a ni.

Ruahmanna hi sawrkar kum khat chhung zel atana siam thin a ni a. NMBA District level committee hian kan hmalakna leh hmachhawp te a duang thin a. Sawrkar office tin atang leh tlawmngai pawlte, khawtlang hruaitute hnen atangin hmalak dan tur rawtna thehlut tura sawm thin an ni.

Kumin sawrkar kumah pawh rawtna thehlut tura sawm an nih angin stakeholders hrang hrang ten rawtna an thehlut a. Chung zingah chuan, Ruihhlo Ngaite Pual camping neih rawtna a lut a. Committee in ngun taka a ngaihtuah hnuah camping neih chu tha an ti a. Chutiang tur chuan hmalakna kalpuiin Camping atan hian Organising Committee din a ni a. Chairman atan Additional DC Pu Lalrinzuala chu ruat niin Vice President ah Upa R. Sanghmingthanga (Jt VC Chairman), Secretary ah Pu H Lalbiakhlua (Sub Headquarters YMA), Asst Secretary Dr Laldinpuia (Sub Headquarters YMA), Treasurer - Pi Lalnunmawii DIPRO, Fin. Secretary Pi Jane C Vanlalmuanpuii, Principal, DIET te ruat an ni.

Committee member ah hian:

1. Serchhip Town chhung Kohhran Hrang hrang Pastor-te
2. Serchhip Town Kohhran Hrang hrang Bial Chairman & Secretary-te
3. Sub-Headquarters YMA, Serchhip OB -te
4. Sub-Headquarters MHIP Serchhip atangin aiawh mi pakhat
5. Sub-Headquarters MUP Serchhip atangin aiawh mi pakhat
6. Rev Jonathan Pachuau FG & CC Councillor Serchhip
7. Department Head te chu a tul anga Committee ah hian koh tel thin an ni.

Organising Committee chuan an hnuaiah hian Sub-Committee peng hrang hrang 6 an siam a. Hmalakna chak taka kalpui niin February 9, 2026 atanga February 20, 2026, camping chhawng khat nei turin ruahman a ni.

District chhunga addict zawng zawng te an luh theih nan zau taka hawn a ni a. Drug Addict bakah zu avanga buai te pawh he Camping-ah hian luh theih a ni dawn a ni.Amaherawhchu, Serchhip District tan chauha hawn a nih avangin District dang atanga lo kalte tan luh ve a rem dawn lo a. Serchhip district chhung khawi khua atang pawhin, zu leh ruihhloa buaite, a duh apiang he camp ah hian lo lut turin sawm an ni.