No.6340/2020-2021

COVID-19 do kawnga hmalatu Hnahthial District Task Force chu vawiin khan an Chairman leh District Bawrhsap ni bawk Pu Vanlalmawia kaihhruaiin a chenna bungalow ah an thukhawm a, COVID-19 No Tolerance Fortnight Ni 26.10.2020 atanga Mizorama neih tur chungchang Hnahthial District a kalpui dan tur an sawi ho.

Meeting kaihruaitu Pu Vanlalmawia chuan Hnahthial District-a Covid-19 hri kai  mi 13 hmuhchhuah tawh zinga 12 te chu State dang atanga Hnahthial Districta hnathawka rawn awm an nih thu sawiin "ei leh bar kan mamawh avangin hnathawh chawlh ngawt theih a ni lova State dang atanga rawn lut turte tih tawp vek chi a nih bawk si loh avangin keimahni theuh hi kan fimkhur a pawimawh a ni" tiin "Tun kan dinhmun thlir hian hmun danga zinchhuah hun a ni lova, Thihna leh Inneihna, puipunna a kal dual dual hun a ni hek lo" a ti a. Mipuite chu pawn chhuak tam lo turin a chah a, COVID-19 No Tolerance Fortnight chu mipui ten thuawih leh hlawk taka an hman ngei a beisei thu a sawi bawk.

He hunah hian Pu Lalbiakkila SP Hnahthial chuan COVID-19 No Tolerance Fortnight chu khauh taka kalpui a nih dawn thu leh dan zawm lo te chu hremna pek zel an nih dawn thu a sawi a, inkaihhruaina hrang hrangte kalkhawmte a hrilhfiah bawk a ni.

Dr.R.Lalsanglura, Medical Nodal Officer report atanga a lan danin Hnahthial District chhungah sample endik hi RAgT atangin mi 134, Truenat atangin mi 214, RT-PCR atangin 248 an awm tawh a, heng zingah hian COVID - 19 hri vei hmuhchhuah mi 13 awm tawhin mi 5 chu enkawl dam an ni tawh a, mi 8 enkawl mek an la ni a, heng positive enkawl mekte hi Construction Company pahnih - ABCI leh BIPL hnuaia hnathawkte an ni. Quarantine pawh tun dinhmunah Govt Quarantine Facility -ah mi 4, Home quarantine mi 12 an awm mek a ni. Hei bakah hian engemaw thuta hman turin District Hospital Hnahthialah Ventilator pahnih dah a nih tawh thu a tarlang bawk a ni. 

Meeting chuan COVID-19 No Tolerance Fortnight chhung atan Hnahthial khawchhungah duty post 6 siam nise a ti a. Heng duty post ah te hian VLTF, Police leh Sorkar hnathawkte chu Nitin zing dar 8:00 atanga tlai dar 5:00 thleng an duty thin ang. He Fortnight chhung hian dan leh thupekte kengkawh a, vil zuitu tur SDC kaihhruaina hnuaiah Enforcement Squad din a ni bawk. Hei bakah hian zan dar 8:00 atanga zing dar 4:30 thleng curfew chu khauh lehzuala kalpui tura tih a ni.