No.233/2020-2021

Kumdang ang bawkin Noaotla-III( KM-10) khua a Strawberry chingtu te chuan Vau thla chawhnu lam atangin an thawhrimna rah an seng leh tan ta a. Mahse Covid-19 inkharhkhipna boruak chuan Strawberry chingtute a ti mangang hle a ni. Strawberry hi chhe awl tak a ni a, a lawh huna lawh loh chuan tawihral mai tur a ni. Covid-19 lockdown boruak hnuaiah chuan a tihriralna turah an mangang hman hle a ni. A then an lawhsa phei chu tawihchhia a, rilral mai theih dinhmunah a awm hlawm tawh a ni, tih DHO, Siaha district Pu Lalvansanga'n a hriatin Siaha khawpui chhunga hralhchhuah dan turte ruahmanna a siampui bakah District pawn lamah pawh thawnchhuah dan a ngaihtuahpui hlawm ta a ni. No-aotlah-III strawberry chingtute harsatna chanchin a lo hriat ve leh; Lunglei khawpuia hralh chhuah turin Divisional Horticulture Officer,Lunglei chuan a staff te rawn tirin; Department Refrigerated Van in an rawn lei sak hlawm ta a ni.

Vawiina an lei sak zawng hi 350 pkts(1.16qtls approx) a ni.DHO, Siaha Pu Lalvansanga chuan DHO, Lunglei leh a Staff te chungah lawmthu ka sawi tak zet a ni; a ti. Lunglei leh Noaotlah -III inkar khaw hrang hranga VLTF ten harsatna engmah awm lova an lokal tlang tir zel avangin VLTF duty te hnenah lawmthu ka sawi tak meuh meuh a ni; a ti bawk.