Vawiin chawhma dar 10 khan NLUP Implementing Board (NIB) Conference Hall-ah Mizoram State Planning & Implementation Department buatsaihin North Eastern Council (NEC) hotu lokalte tan meeting buatsaih a ni a, Pu P.L. Thanga, State Planning Board, Member & Secretary chuan a kaihruai.

Pu P.L. Thanga chuan Power Point Presentation hmangin, Mizoram sorkar-in NLUP ah hma a lak tawh leh kalpui mek dante hrilhfiahna a nei a, NEC hotu Mizoram lokalte chuan NLUP hmalakna chu tha an tiin North Eastern State dangte tan pawh NLUP hmang hian hlawkpuina tur nasa tak awmin an hriat thu an sawi.

He meeting a lotel Pu G.K. Chin, Financial Adviser (NEC) leh Pu M. Iboyaima Meitei, Adviser, Agriculture & Horticulture, NEC te chuan NLUP chu project tha tak anih thu an lo hriat tawh chungchang leh NLUP chungchang zir chiang tur hian seminar, Shillong-ah buatsaih thuai NEC chuan a tum thu an sawi a, he seminar neih hun hian NE State hotu hrang hrang an tel tur thu an sawi a ni.

Pu G.K. Chin chuan NEC kalphung duan that tum mek anih thu sawiin, NE State te tan NEC hmasawnna chak zawka a kal theih ngei a beisei thu a sawi bawk.

He meeting-ah hian State Planning Board Official te bakah NLUP Line Department hotute an tel bawk a ni.