Vawiin chawhma dar 10:30 khan N.Khawbung Lal Thanghlianga Sailo Lungdawh chu Pu P.C.Zoram Sangliana Minister of Art & Culture in a hawng.

Khuallian Pu P.C.Zoram Sangliana chuan thu sawiin North Khawbung khawtlang hruaitute leh mi thahnemngai te’n a an Lal ropui tak mai Thanghlianga Sailo hriatrengna lungphun an han buatsaih thei ta mai chu a lawmpui thu sawiin an thiltih hlu tak chuan thil tha tih zel duhna kawngah thalaite cho chhuak se la, Lal ropui Thanghlianga Sailo, Lal ropui leh duhawm, a mize tha tak mai entawn na chang kan hriat theih nan he lungdawh hian rah tha chhuah ngei se tih chu a duhthusam a nih thu a sawi.

Minister chuan Lal Thanghlianga Sailo kawng hrang hranga ngaihsan tlak anihna a tarlan zingah zirna ngaihsan nachang hre hmasa mi a nih thu sawiin Govt.Mizo High School ni ta an din dawn tumin Lal thenkhat leh Bawrhsap te meuh pawh school din tul ti lo, lamah an awm a, mahse huaisen takin Thanghlianga chuan Bawrhsap hnenah Mizote rethei te te, Shillong ah te pawh lehkha zir thei lo an ni a, zofate hi in chhiahhlawh ah awm tir vek in tum emni an ti mai chu Bawrhsap meuh pawh a sen awp awp a, a tawpah School din chu an rem ti tlang ta hram a ni a ti a, A khua leh tui, a thiante leh a hote tana a thil phal ziate leh Mihuaisen anih thu sawiin Huaisen lawmman pawh a dawng nual a, 1911-a Abor run naah a kal pawh hna a thawh that avangin hming tha takin a lo haw a, 1917 –a German ral runin France ramah a kal pawh a huasen zia ringawt an hrilh fak a ni a ti.

Khualzahawm Pu T.T.Zothansanga Bialtu MLA pawhin thu sawiin Lal chawimawi tlak tak chhungkua leh N.Khawbung khawtlang te thil tihna a tel thei chu lawmawm a tih thu sawiin Lal Thanghlianga tu leh fate chu chhungkaw chawimawi tlak, zahawm leh Pathian tih mi an ni a, thangthar te hian an thil tih leh mize tha lai te hi I entawn zel ang u a ti.

Champhai SP thar Pu Prajesh Kumar Singhvi IPS pawhin mizo tawng thu sawiin ni li lek Champhai ah a la awm a, hetiang programme pawimawh a tel na hmasa ber ah Mizo culture mawi leh tha tak a hmu chu lawmthu sawiin Lal chhungkua chu ngaihsanawm a tih thu a sawi.

He programme kaihruaitu Pu Sangthanga VCP N.Khawbung chuan an khawchhung atanga km 3 vel a awm Lalruanga Lung kalkawng siam that Minister hnena bawhzui sak tura a ngenna chu Art & Culture Minister chuan lo bawhzui pui a tiam a ni.

Pu Thanghlianga hi Sailo Lal Pu Lalsanga (L) fapa niin lal rorel thiam leh khua leh tui ngaihsak mi a ni a. Pu Lalsanga hming chawia sak Dr.Sangthankima TNT founder chairman pawhin thu tha tak a sawi a,Pu Lalnunmawia,Principal Govt Champhai College in chhungkaw aiawhin Lal Thanghlianga chanchin a sawi a ni.

Lal Thanghlianga tu leh fate hi mi chhuanawm tak tak leh mi puitling tak tak an ni hlawm a. An chhungkua hian Rs.30,000/- N.Khawbung khawtlanga tan an pek chu Lal Thanghlianga fapa Upa Lalruma’n a hlan a ni.

Vawiin lungdawh hawnna programme ah hian thusawi te, TNT naupang zai leh lam, mizo cultural items hmuhnawm tak tak te leh zai mawi tak tak te ngaihthlak leh entur a awm reng bawk.