Urban Development & Poverty Alleviation (UD&PA) Department chuan Mizorama e-office hmasa ber nih tumin chak takin hma an la a. Hemi chungchang ngaihtuah hian Minister Pu Zodintluanga chuan vawiin khan a pisaah meeting pawimawh tak kovin thla thum chhunga bawhzui ngai zawng zawng ti fel a, November thla tira e-office a inleh hman ngei an tum.

Pu Zodintluanga chuan Mizorama e-office hmasa ber nih tuma tan an lak dan sawiin thla thum chhunga inbuatsaih fel hman an beisei thu leh November thla tirah UD&PA Secretariat leh Directorate office chu e-office a leh hman ngei an tum thu a sawi a. Mizoram tana hemi kawnga a sulsutu department nih tumin tha taka bul an tan theih phawt chuan sawrkar department dangte tan pawh e-office ni tur hian awlsamna a siamsak a beisei thu Minister chuan a sawi.

Meeting-ah hian UD&PA, Information & Communication Technology (ICT) department leh National Informatics Centre (NIC)-te an tel a. E-office nei tura tih tur tul zawng zawng chak taka bawhzuiin review meeting pawh thla tin neih tha an ti a. Department lamin tih tur an neihte thla khat chhunga tihfel tum niin sawrkar laipuia bawhzui ngaite chu NIC kutah dah a ni.

E-office hi a taka kalpui theih a nih hun chuan sawrkar hnathawh dan a tha zawngin nasa takin a her danglam dawn a. Dawhkan pakhat atanga dawhkan danga file put kual ngai tawh lovin computer hmangin awlsam takin thawn kual a ni ang a, data leh hriattur pawimawh reng reng file hai chiam ngai lovin awlsam taka hmehchhuah mai theihin a awm reng tawh dawn a ni. Hei hian sawrkar hna kallai a tih chak mai bakah a dawrtu mipui tan pawh awlsamna a siamsak dawn a ni. State Data Centre (SDC) hmang tangkaiin Directorate office-a dawhkan tin te leh Secretariat office an inthlunzawm ang a. File kal reng reng lehkha a chhutchhuah a, peon te ken kual ngai lovin e-file hmangin computer-ah lehkha te hi an inthawn zung zung tawh zawk dawn a, thu pawimawh vawn (confidentiality) ah pawh nasa takin a pui dawn a ni.

India sawrkar chuan e-office tangkaizia hriain National e-Governance Plan hnuaiah e-office Mission Mode Project a kalpui mek a. Sawrkar laipui office tam takah leh state sawrkar thenkhatah e-office hi hman a ni tawh a. Langtlang sawrkar siamna kawngah a thawhhlawk piah lamah sawrkar sum luangral tur tam tak a hum a ni.