Aizawl khawpui chhunga National Service Scheme (NSS) Unit 29 tangrual buatsaihin vawiin khan National Service Scheme kum 50 tlin lawmna Vanapa Hall-ah neih a ni a, Sports & Youth Services Minister Pu Robert Romawia Royte-in khuallian niin a hmanpui.

Khuallian Pu Robert Romawia Royte chuan NSS volunteers ten khawtlang leh ram tan thil tha tak tak - thingphun, thisen pek, orphanage home tlawh a tanpuite, mipui zirtirna awareness program hrang hrang vantlang tan an buatsaihte, kawngpui leh vantlang hmun pawimawh tihfai te an neih thin avangin lawmawm a tih thu a sawi a. NSS in thisen pe tamber nihna an chang mek chu NSS Nodal Department changtu Minister anihna ang pawhin a ngaisang hle tih sawiin uar zel turin NSS Volunteers zawng zawng te a sawm a ni. Minister chuan kumthar atangin College leh Higher Secondary School Volunteers zinga thisen pe tam ber te hnenah Sports Minister’s Trophy For Blood Donation pek a ni ang a, sum fai pawh a keng tel ang a ti.Hei bakah hian No Smoking Institution 20 chu Sports Items chi hrang hrang Volleyball Net, Volleyball leh Football te pek an nih tur thu a sawi bawk.

Khuallian chuan chuan Zirlaite chu pi leh pute khuaa zin tam a, remchang hmuh chuan state dang te pawh tlawh tam turin a fuih a ni. Tourism Minister a nih angin October ni 4-5, 2019 a Anthurium Festival a Reiek hmuna neih turah tel vek turin NSS PO te leh Volunteers te a sawm bawk.

Faina chungchangah mi dangte zirtirtu ni turin NSS volunteers te chu a chah bawk a, Sports Minister chuan Mizoram Sorkarin Mizote chu India rama Hnam Fit ber ni turin Fit Mizoram Program a kalpui tan mek a, mitinin fitness ngaipawimawh ang u a ti.  Chief Guest hian NSS Cell Mizoram Annual Report 2018-19 a tlangzarh bawk a ni.

NSS hi kum 1969 September 24 (Mahatma Gandhi birth Centenary kum)- ah din a ni a. A din tirh ah chuan University leh State thlan bikah te chauh hawn a ni a, student enrolment pawh 40,000 (singli) chauh an ni thei a. Mahse zawi zawiin University leh State hrang hrangah an hawn belh zel a, tunah phei chuan NSS enrolment chu India ram pumah phei chuan nuai sawmthum pali (34 lakh) lai a lo tling tawh a ni.

Mizoramah chuan Pachhunga University College-ah kum 1972 khan NSS hi din a ni a. Chumi hnuah College hrang hrangah din belh zel a ni. Kum 1996 atangin College-ah Pre- University (P.U) awm tawh lovin, Higher Secondary School lamah an kal tak avangin, NSS pawh Higher Secondary School lamah din a lo ni ve leh ta zel a ni. Tunah hian Mizoram pumah NSS Unit awmna School leh College 86 a awm a, kum 2019 -2020 enrollment-ah chuan NSS Volunteer zawng zawng chu 30,100 an ni. NSS hi Centrally Sponsored Scheme ni thin kha Central Sector Scheme-ah kum 2016 atang khan thlak a ni a, Central sawrkarin 100% funding a rawn tum tawh a ni.

Kum 1988 atang khan, Mizoram ah a hranin State NSS Cell din a ni a, chu chu State NSS Officer cum Deputy Secretary-in a ho a, Nodal Department atan Sports and Youth Services department hman a ni.

Kumin 2019 hi NSS Golden Jubilee year a nih avangin, NSS Day hi vawiin ni 24th September hian Mizoram pumah a lawmna neih a ni. Aizawl bakah District headquarters zawng zawngah NSS unit hrang hrangten a huhovin NSS Day lawmna hun an hmang a ni. District headquarters ni pha lo, NSS unit awmna zawng zawngah NSS Day hi anmahni remchan dang angin an lo hmang ve vek bawk a ni.

Vanapa Hall-a NSS kum 50-na lawman ah hian Aizawl khaw chhunga NSS unit hrang hrang 29 atangin NSS Volunteers leh Programme Officers 800 vel an pung khawm a, He NSS Day lawmna inkhawm hi Prof. P. Rinawma, Programme Coordinator NSS Cell, MZU chuan a kaihruai a. Dr. Zirlianngura State NSS Officer cum DS NSS Cell Mizoram chuan NSS lo pian chhuah dan leh a thil tum tlangpui te a sawi a,  NSS volunteers leh Programme Officer-te khawtlang tana an hnathawh hrang hrang te a sawi bawk a ni.

Vawiin inkhawmah hian NSS Cell Mizoram kumin 2019-2020 atana a thupui (Theme) 'Tobacco and Cancer Control' tih hmangin Dr. Zorammawia, Joint Director (Dental), State Nodal Officer, National Tobacco Control Society chuan Vaihlo  leh a kaihhnawih tih a that lohzia, cancer thlentu ber pakhat a nih dan te zirtirna hun a hmang bawk a ni.