Vawiin khan I & PR Auditorium-ah Mizoram chhunga NSS Programme Officer te meeting neih a ni a. District hrang hrang atangin Programme Officer 51 kalkhawmin Swine Flu leh Fire Hazard chungchangah ramchhunga zirlaite a tha zawnga zirtirna pek an nih theihna turin training neih a ni a. Pu Darchuailova Renthlei, State Liaison Officer & Deputy Secretary (NSS) in a khaihruai a ni.
He hun hi Ms. A. Wallang, Deputy Programme Adviser, New Delhi leh Mr. Deepak Sharma, Youth Officer, Regional Centre (NER), Guwahati mi ten an rawn hmanpui a. Zirtirna pe turin Dr. Pachuau Malsawm, Medical Officer leh Pu Lalthangliana, IFS, DFO te chuan hun an hmanpui bawk.

NSS Cell, Mizoram hnuaiah hian Institution 68 a awm a, Unit 231 neiin Volunteer singhnih chuang an awm mek a ni. NSS Cell chhungah hian College 21 awmin Law College 1, Technical Institution 3 leh Higher Secondary School 43 an awm mek a ni.

NSS Cell, Mizoram hi India ramah pawh hnathawk nasa ber pawl a ni a, a mamawh te tana thisen pek, faina kawnga hma hrang hrang lak leh zokhaw hmun hrang hranga thlawmngai pawl te nen thawkho a, midangte tanpui hna thawh hi an hmalakna langsar zual a ni. National leh International level thlengin midangte nena thawhhona tha nei turin hma an la bawk thin a ni.

24th September, 2009 hi NSS Day a nih angin Mizoram pumah faina inzirtirna hun atan hman a ni dawn a. Zirlai za tam takin Aizawl khawpui leh District hrang hrangah te Faina Inzirtirna beihpui an thlak dawn a ni