Serchhip District chhungah National School Safety Programme (NSSP) Sensitisation Programme kalpui mek niin hemi puala hmalakna chi hrang hrang zinga pakhat Primary School leh Middle School zirlaite intihsiakna chu vawiin atang hian tan a ni.

Vawiin chawhma dar 10:00 khan Serchhip District chhunga Sawrkar leh Mimal enkawl Primary School zawng zawngah milem inchei siak (Colouring) inelna neih a ni a, Disaster Management & Rehabilitation Department in milem chei tur leh a cheina tur hmanrua tum sakin heng School hrang hranga a titha pahnih hi an School thuneitu ten an thlang chhuak ang a, September ni 19, 2014 ah anmahni bialtu SDEO ruahmanna in SDEO-level colouring competition ah an intihsiak leh ang. SDEO-level intihsiakna a titha zual thlanchhuahte milem chei chu District thuneitu ten lo endikin lawmman an siam ang a, a titha berin Rs. 5000/-, pahnihna in Rs. 3000/-, pathumna in Rs. 2000/- a dawng dawn a ni.

Vawiin vek chawhma dar 11:00 khan District chhunga Middle School zawng zawng pualin lemziak intihsiakna huaihawt a ni a, thupui thlan tur pathum “Lirnghing, Leimin leh Mei kang” zinga an duh ber thlangin zirlaiten lem an ziak a, an chei nghal bawk a ni. Disaster Management & Rehabilitation Department in lemziahna tur hmanrua leh a cheina tur water colour tum sakin Primary School intihsiakna ang bawkin SDEO level leh District level intihsiakna kalpui a ni ang a, a titha berin Rs. 7000/-, pahnihna in Rs. 5000/-, pathumna in Rs. 3000/- a dawng dawn a ni.

Ruahman lawk dan chuan September ni 19, 2014 hian High School (Essay Writing) leh Higher Secondary School (Poster with Slogan Writing) tan District-level Competition buatsaih a ni ang.