Mizoram Health & Family Welfare Department leh UNICEF buatsaihin vawiin khan Reproductive Maternal Newborn and Childhealth + Adolescent(RMNCH+A)chungchang consultation meeting chu Aijal Club-ah neih a ni a. Health Minister Pu Lal Thanzara’n he meeting hi Khuallian niin a hmanpui.
He Consultation meeting ah hian nausen damkhawchhuahna tur leh hrisel taka an thanlen theihna tura nu leh naupang hriselna te, an tleirawl chhuah atanga hriselna tha tak an neih theih dan tur leh sorkar hmalakna hrang hrang te sawi ho a ni a. He hmalakna tipuitling tur hian Health & Family welfare department hmalakna chauh a tawk loh avangin hriselna tha neih theihna tura thawktu dang, Social Welfare, Public Health Engineering, Power & Electricity, Education leh Rural development te nena tan lakho dan tur te, thawhho pawimawh zia te zir ho a ni bawk.
Health Minister Pu Lal Thanzara chuan nau chunga nu thihna,Maternal Mortality Rate(MMR) leh nausen pianghlim thihna,Infant Mortality Rate(IMR)titlem tura tan lak nasat a tulzia sawiin 12th Five Year Plan chhungin naupiang 1000 zela IMR chu kum 2017 ah chuan 25 a tlaktir tur leh nu 1,00,00 zela MMR pawh 100 ah titlem turin target neih a ni a. Mizoram ah chuan naupaing 1000 zleh 30 thi an la awm a ni, a ti a. Health department chhinchhiah danin kum 2012-13 chhung khan Mizoramah nausen pianghlim thi 600 leh nu nau chunga thi 12 an awm a ni, a ti. Pu Lal thanzara chuan National Rural Health Mission hnuaiah sorkarin mipuite hriselna atana ruahmanna hrang hrangte a kalpui reng a. Health department pawhin hna thawh that avanga chawimawina national Award hial te dawng mah se, inenkawlna hmunhma leh hmanraw mumal awm lohna khaw engemaw zat a la awm tih sawiin hengah te hian nu naupai leh nau nei ten harsatna an tawk nasa a. A taka RMNCH+A ti hlawhtling tur chuan Health department hnuaia doctor leh staff te chauh ni lovin department pawimawh dangte nen tangrualin hma an lak ho a pawimawh tak zet a ni, a ti a. Consultation meeting chu a hminga inrawn khawm nan hmang liam mai lovin, a taka hma lak dan tur duan chhuah na atan hmang tangkai turin kalkhawm te a chah a ni.
Vawiina consultation meeting chawhma hun hi Health Secretary Pi Esther Lalruatkimi IRS in a kaihruai a. Khualzahawm Pi M.Sathiyavathy IAS, Chief Secretary chuan IMR leh MMR titlem tura department hrang hrang thawh hona chungchang, intersectoral convergence tih thupui hmangin thu a sawi a. UNICEF aiawhin Dr. Suddha Balakhrishnan, Health Specialist chuan Call to Action for Child Survival & Development tih thupui sawifiahna a nei bawk a. District 4- Lawngtlai, Lunglei, Mamit leh Saiha atangin D.C te leh heng department head, Social Welfare, PHE, P&E, Education, Rural Development leh Health department te an tel a. UNICEF, Delhi leh RRC-NE Guwahati aiawhte an tel bawk a ni.
