Mizoram hmun hrang hranga NLUP 2nd Phase (2nd Installment) sem runpui nimina neihah, Govt. High School, N. Vanlaiphaiah Hrangturzo Cluster puala semna inkhawm chu Education Minister Pu Lalsawta chuan khuallian niin a hmanpui.

Thu sawiin Pu Lalsawta chuan, “NLUP chu Policy mai ni tawh lovin, a taka sorkarin sum tam tak senga a bawhzui avangin Programme a nih tawh,” a ti a. NLUP tanpuina dawngtute chu taimakna leh inhuamna nena an thawh chuan NLUP hi an dinchhuahpui ngei ang, a ti bawk. Education lam pawh sawilangin, Pu Lalsawta chuan, “Sorkarin ram tana tha ber tur ngaihtuah chungin, khawvel inher mil zelin zirna kawngah theihtawpin hma a la a ni,” a ti a. Adhoc, Aided sikul te tihchangtlun lehzual an nih tur thu leh, sorkar sikul siambelh aiin a awmsa te chawikan an tum thu a sawia; zirna sikul tha nei tur chuan a khaw mipuiten neitu chan changa zirna hmasawnna atana an tanrual a pawimawh thu a sawi bawk.

He inkhawmah hian Hrangturzo Cluster huamchhunga NLUP Line Department pasarih- Agriculture, Veterinary, Horticulture, Soil & Water Conservation, Sericulture, Fisheries leh Industries Depatment-te hnuaia trade hrang hrang thlangtu mi sawmhnih chuang hnenah Khuallian hian cheque a hlan a, beneficiaries dangte chu an account theuhah dahsakin,a tula anga bawhzui tura ruahmansak an ni.

He hun hi SDO(C), N.Vanlaiphai, Pu Ngulsangvela chuan kaihruaiin, Pastor C.Ladintluanga’n hunserh a hmang a, Pu Lalthanmawia Sailo, VCP, N.Vanlaiphai chuan inlawmna thu a sawi bawk. Education Minister tawiawma he hun hmanpuitu, Pu Zorammuana, Secretary, NLUP Implementing Board chuan NLUP kalphung leh ruangam te chipchiar takin a sawi a, mipuiten NLUP chungchanga zawhna an neihte hrilhfiahna hun a hman hnuah, Pu Lalmalsawma, Headmaster, Govt. High School, N.Vanlaiphai chuan lawmthu sawiin hun a khar a ni.