No.1806/2021-2022

Champhai, the 12th August, 2021: India ram zalenna ni vawi 75 na tlin hriatrengna leh lawmna puala zalenna sualtute leh zalenna nei tura beihna hrang hrangte hriatrenga chawimawinan, Nehru Yuva Kendra Sangathan (NYKS) Champhai chuan Azadi Ka Amrut Mahotsav hnuaiah programme hrang hrang a kalpui mek zel.

Azadi Ka Amrut Mahotsav pual hian NYKS Champhai chuan fai hnatlang 'Cleanliness Fortnight/Swachhata Pakhwara' chu August ni 1 atanga ni 15, 2021 thleng awh tur a kalpui mek zel a. National Youth Volunteers, Youth Clubs leh Youth Leaders te'n khawlai leh vantlang hmunhma thenfai hnatlang an nei thin a, fai pawimawh zia inzirtirna an neih bakah thing phun hnatlang an nei bawk. Hmun hring leh fai nuam taka India ram siam kawngah mitinte kan pawimawh avangin he program a tel theuh tur hian NYKS Champhai chuan mipuite a sawm a ni.

Azadi Ka Amrut Mahotsav pual hian August ni 14, 2021 ah Covid-19 inkaihhruaina zawm chungin NYKS Champhai chuan FIT INDIA Freedom Run buatsaih a tum a. District khawpui mai bakah zokhua-ah te neih tum a ni. Pu Dinesh Jangid, District Youth Officer, NYKS Champhai chuan Azadi Ka Amrut Mahotsav hlawhtling taka hman a nih theihna turin thalai leh pawl hotute, YMA leh khawtlang hruaitute chu he Freedom Run hi ngaipawimawha hnam inpumkhatna, chawimawina, hriselna leh thianghlimna kawnga thalaite kawhhmuhtu tha tak a nih theih ngeina tura thawhhopuiah a sawm a ni.

District Administration nena inrawntlang chungin Azadi Ka Amrut Mahotsav pual hian hmeichhiate hriselna Women's Menstrual Health lam hawia inzirtirna ngaihpawimawh a ni dawn bawk a, zo khuaahte organic reusable sanitary pads sem tum a ni a, hemi tur hian NGO pakhat SANITREE INDIA nena thawhhona neih niin, an ni hian National Youth Volunteer-te training an pe dawn a ni.