No.1844/2021-2022 

Champhai, the 14th August, 2021: India ram zalenna ni vawi 75 na tlin hriatrengna leh lawmna puala zalenna sualtute leh zalenna nei tura beihna hrang hrangte hriatrenga chawimawina kalzelah Nehru Yuva Kendra Sangathan (NYKS) Champhai chuan Azadi Ka Amrit Mahotsav programme hnuaiah, Fit India Mission hlawhtlin theihna kawnga rahbi pawimawh tak  Fit India Freedom Run 2.0 chu vawiin khan Champhai leh Khawzawl District-ah te a buatsaih.

Azadi Ka Amrit Mahotsav hnuaia Fit India Freedom Run hi India ram pum huap khua leh tui tam zawkte tel theihna tur, India ram hrisel leh thalaite hriselna ngaipawimawh chunga duan a ni a. August ni 13 atanga October ni 2, 2021 chhunga hman tur a ni a. Thau lutuk, nguaina, rilru hah leh natna dangte ven kawnga hmalakna niin, khawi hmun leh engtik hunah pawh mahni insawizawia tlan hi chawilar zel tur ani tih thupui hmanga neih a ni. 

Union Sports & Youth Affairs Minister Pu Anurag Thakur chuan Fit India Freedom Run hi nimin August ni 13, 2021 khan he program hi a hawng a. NYKS Champhai huaihawtin Champhai leh Khawzawl District-ah Covid-19 inkaihhruaina tha taka zawm chungin he hun hi kalpui niin,  thalai, thalai hruaitute, naupang, leh YMA hruaitute an tel a ni.

Pu Obed Lalmalsawma, District Sports & Youth Officer (DSYO) & SDC Champhai District chuan taksa insawizawi leh hrisel tura tanlak a tul thu sawiin, thalaite chu hriselna kawng zawh tura theihtawp chhuah tur leh taksa insawizawi ngaipawimawh tlat turin a chah a ni.

Pu Dinesh Jangid, District Youth Officer, NYKS Champhai chuan hlawhtling taka Fit India Freedom Run neih a nih theihna kawnga tel zawng zawngte chungah lawmthu a sawi a. District Administration leh Village Council-te chungah lawmthu sawiin, thalaite chu an nitin nunah taksa sawizawi ngaipawimawha tlan tam turin a fuih a. Taksa hrisel chuan rilru hrisel a siam a, hlawhtlinna tinrengin a umzui thin a ni, a ti bawk.