No.6011/2020-2021

Vawiin khan School Education Minister Pu Lalchhandama Ralte hovin School hawn chungchang leh a kaihhnawih thildangte Secretariat Conference Hall, MINECO-ah rel a ni a. Minister hi MLA Pu L.Thangmawia, Vice Chairman, Human Resource Development Board in a tawiawm a ni.

Minister Pu Lalchhandama Ralte chuan COVID-19 hripui leng avangin thla ruk leh a chanve vel school regular-a kal a nih tawh loh thu a sawi a, hetih chhung hian School Education Department chuan zirlaite an awm awl loh nan an tih tur thil tam tak (activity) a lo buatsaih tawh a ni, a ti a. Academic Year kal zelah kumkhat hloh a, kuangkuaha awm ringawt theih a nilo a, Ministry of Home Affairs in order a lo chhuah angin, October ni 15 hnu lam hi chu state sawrkar ten COVID-19 boruak leh dinhmun thlir chunga ruahmanna siam a phal angin leh March 2021-a Academic Year tawp hun thlirin, vawiin hian zirna in kal zel dan tur, rel tura in kohkhawm a ni, a ti.

Meeting-ah hian Class-X leh Class-XII zirlai naupangte Board Exam hmachhawn tur an nih avangin, October Ni 16, 2020 atangin nitin school kal dan pangngai (regular)-in school kal ni tawh se an ti a. COVID-19 hri laka an him theih nan Directorate of School Education in inkaihhruaina (draft SOP) a siam enho a ni a, siam danglam ngaite siam that niin, mizo tawnga ziah inkaihhruaina (SOP) tihchhuah a ni ang.

Hostel a awm tur zirlai Class IX-XII inkar te chuan RAgT test an paltang tur a ni a, negative result nei chauhte chu hostel luh phalsak an ni ang, hostel neitute leh enkawl tuten ruahmanna felfai tak an siam tur a nih bakah; Directorate of School Education ruahmanna angin leh a tuldanin Health Department te nena tangkawpin hostel a him leh him loh te enfiah ni se an ti.

Class IX leh Class XI zirlaite chu tuna ruahmanna kalpui mek, an zirtirtute rawn tura school an kal chu chhunzawm ni se, tih pawm tlan a ni bawk a. Primary, Middle School bakah Class IX leh Class XI zirlaite kal zel dan tur chu November thla chanve hma-in ram chhunga COVID-19 boruak thlir chungin meeting neih leh ni se, tih a ni.

Meeting-ah hian Chief Secretary Pu Lalnunmawia Chuaungo, Commissioner & Secretary, School Education Pi Esther Lal Ruatkimi leh midangte bakah Principals’ Committee Chairman, Govt. Higher Secondary School, Mizoram Kohhran Hruaitu Committee (MKHC), Central Young Mizo Association, Mizo Zirlai Pawl, Mizo Students’ Union, PTA, MSTA, HSTA, HISSLAM, Mizoram Independent School Association aiawh te an tel a ni.