Offgrid Renewable Energy Access Projects in Mizoram tih thupui hmangin vawiin chawhma dar 10 khan Aijal Club-ah Workshop neih a ni. Pu Lal Thanzara, Minister of State chu khuallian niin he workshop nileng awh tur hi a hmanpui a, he programme a (milem, model leh thil lem pho lan hrang hrang) Exhibition chu a hawng nghal a ni.
Pu Lal Thanzara khuallian chuan thu sawiin he workshop a tel mi chi hrang hrang Department hotute NGO leh zirlaite leh Power & Electric hmang tangkaitu an sawm te chu hlawkpuina nei ngei tura duhsakna hlan in Mizo mipuiten kan mamawh a nih avanga he workshop hi hmang tangkai ngei turin a sawm.
Tunah hian sorkarin Renewable Energy chungchang hi a zir chiang mek a, Solar Energy siamna tur Laipuitlang-ah bun mek a niin ni zung chakna hmanga eng pek dan tur pawh a duang mek a ni tih sawiin Minister chuan a theih chin ah sorkar in hma a sawn mek in a sawn belh zel a, Mizoram chhunga electric hruipui la thlun phak lohna ah pawh eng an neih ve theihna turin a ngaihtuah sak mek a ni a ti a. Power tha nei tur hian mahni awmna hmun theuhvah kan rilru inhawn a ngai a, khawvel ram changkang zawk ah pawh Power hi a tangkai tih an hriat avangin renchem nachang an hria a, keini pawhin kan renchem a ngai a ni a ti bawk. Sikul hrang hrang ten hemi kaihhnawih a thil siam entirsiakna an neih a lawmman pakhatna latu Home Mission School leh Chaltlang High School te hnenah khuallian hian lawmman a sem nghal a ni.
He workshop ah hian Pu Lalrinmawia Director, ZEDA chuan in lawmna thu sawiin workshop hi a kaihruai a. Pu Harry Dhaul, Director General IPPAI in Hybrid Renewable Energy chungchang short video hmangin a sawifiah bawk. Nilengin he lam kawnga mi thiamten an zirtir ang a, sawihona te neia hun hman a ni.
