Champhai North bial atanga thlantlin Mizoram Sorkar thara Parliamentary Secretary mawhphurhna pek tak Pu T.T. Zothansanga chuan vawiin chhun khan a office a luah tan ve ta a. Pathian hnena hlanna leh hunserh Rev. K. Laldailova chuan a hmanpui a ni.
Parliamentary Secreatry chuan a tun hma nun sawiin rethei taka seilian leh inhlawhfa chunga lehkha a zir dan te, Pathian ven leh awmpuina avanga he dinhmun a luah theih avanga a lawmthu leh mipui leh sorkar zara mawhphurhna sang tak a chelh chu dik tak leh Pathian duhdan a ram rawngbawlna hna thawh a tum thu a sawi a ni.
He hun a tel ve Pu T.T. Zothansanga’n a tawiawm tur FCS&CA Minister Pu John Rotluangliana chuan amah tawiawm tura mi tha leh dik pek a ni chu lawmawm a ti a, an department enkawl atanga mipui mimir hamthatna leh chhenfakawm tur thil reng reng te chu theihtawp chhuaha hmalak an tum tur thu a sawi lang bawk.
Vawiina Pu T.T.Zothansanga office luah tanna hun hi Parliamentary Secretary Pu K. Lalrinthanga; Govt. Dy. Chief Whip Pu R.L. Pianmawia; Law Commission Chairman Pu John Siamkunga bakah Department hotulu, chhungkhat laina te leh Champhai North Party hruaitu engemaw zat an tel a ni.
