Oil leh Gas renchem puala chawlhkar hnih (15 – 31 January) chhunga ‘Oil and Gas Conservation Fortnight’ hman chu vawiin khan a kharna hun Food, Civil Supplies & Consumer Affairs (F,CS&CA) Department Conference Hall-ah a neih a ni a.Pu Rokunga Ralte, Addl. Director F,CS &CA in Forthnight kharna hun hi a hmanpui a ni.

Pu Rokunga Ralte chuan oil leh gas chu mihring nunna tan a pawimawh tih sawiin, kum tam tak a daih dawn loh avangin renchem taka hman inzirtir leh inhrilhhriat uar a tul a ni a ti a. Tunlaia gas harsatna chungchang sawiin, Pu Rokunga Ralte chuan nikum lamah Guwahati Refinery a kangmei a chhuah avangin Mizoram ah gas supply a khaihlak a. Refinery chu siamthat tawh niin hunrei vak lovah chuan IOC hotuten gas supply a pangngai leh an beisei thu a sawi bawk. Nikum lama Kohhran hrang hrangte krismas leh kumthar vuakveta ruaitheh nana domestic cylinder an pek thin chu kumin atang chuan eirawngbawlna gas lian chi ‘Commercial gas cylinder’ chauh pek an tum tawh thu inkhawmah a hian tarlang bawk a ni.

Oil and Gas Conservation Fortnight hi Indian Oil Corporation (IOC) bultumin ram pumah buatsaih a ni a. Hemi hun chhung hian Aizawl-ah, IOC chuan Luangmual ah LPG Clinic an buatsaih thu te; St. Paul’s HSS a essay leh painting competition an buatsaih thu te; Transport leh Agriculture Department ah te sawihona hun neih anih thu te leh petrol pump hrang hranga banner tar leh leaflet te sem a nih thu Pu K V Nela Deputy Manager IOC chuan a sawi.

Vawiina inkhawmah hian Oil leh Gas renchem puala painting leh essay inziah siakna buatsaih ah zirlai titha te hnenah lawmman sem nghal a ni.