Vawiin khan Chief Minister Pu Lal Thanhawla chu a Office-ah Oil India Limited (OIL) aiawh pathum ten an hmu a, Mizorama an hmalak tawhna tlangpui te hrilhin, Maubuang Drilling Site-a lei verh hna chu July thla tir lamah tan an tum thu an hrilh bawk a ni.

Chief Minister Pu Lal Thanhawla chuan Mizoram Block-a oil leh gas zawnchhuah hna Ministry of Petroleum & Natural Gas-in Company hrang hrang hnenah a pekte zingah OIL hnathawh dan chu a chak ber nia a hriat thu sawiin harsatna an tawh te pawh chipchiar takin a zawt bawk. OIL aiawh te chuan State Sawrkar a in hawng thu sawiin State Sawrkar in OIL a puihna kawng hrang hrangah lawmthu an sawi a ni.

OIL India aiawh te chuan Maubuang Drilling Site chu lei verh hna tan atan a hmun hma te peihfel ani thu an sawi a, July thla tir lamah lei verh hna tan an beisei tih Chief Minister an hrilh a. Lei verh hna tan anih theih nan OIL hnuaia service provider company hrang hrang 15 vel chuan bungrua truck trailer 400 vel fur in a nan hma in an dah a ngai a, tiin heng motor tana Road Permit chu a rang lamah peih fel sak turin Chief Minister an ngen. Hei bakah hian Keifang Drilling Site-a lei verh bungrua phurh nan Seling leh Keifang inkar kawng a then lai zauh nan Border Roads Organization hnenah hemi atana sum mamawh zat an pek tawh thu leh BRO lamin hma an la lak loh thu te an hrilh a. Chief Minister chuan Road Permit chu a rang lama tihfel sak tiamin, Seling-Keifang kawng zauh chu Project Pushpak Chief Engineer ko a, hemi chungchang sawipui a tum thu OIL aiawhte hi a hrilh a ni.

Vawiina OIL aiawh a Chief Minister hmutu te hi – Dr. Rahul Dasgupta, General Manager, NEF Project OIL; Pu Diganta Bora Chief Chemist, NEF Project, OIL leh Pu Gautam Das, Chief Engineer(Civil), NEF Project, OIL te an ni.