Vawiin khan Agriculture Department Committee Room-ah Dr. S. Arulraj, Director, Directorate of Oil Palm Research, ICAR, Government of India leh Mizoram Agriculture Officers ten an Director, Dr. C. Lalzarliana hovin meeting an neihpui.
Vawiina meeting-ah hian Mizoram hmun hrang hranga Oil Palm chinna te Power Point hmanga entir a ni a. Mizoramah hian ram 1,01,000 hectare hi Oil Palm chin theihna hmun atana remchang a nih thu te, tun dinhmuna Mizoram-a Oil Palm chin tawhna hmun hrang hrang te, 12th Plan chhunga Oil Palm ching tura Department inbuatsaih dan te sawiho a ni. Tun dinhmunah Mizoram hmun 3 – Bukvannei, Rotlang leh Mat Ruamah te Oil Palm Factory din tura hmalak mek a nih thu te tarlan nghal a ni bawk.
Dr. S. Arulraj chuan Mizoram-a Oil Palm hmasawnna tur kawng hrang hrang te sawi langin Mizoram chu a leilung leh boruak enin Oil Palm chinna atana hmun tha tak, sik leh sa thu-ah te, ruahtui tla leh a leilung dinhmun te chu duhthusam a nih thu leh tuna Oil Palm rah len zawng te chu tha tawk a tih thu sawiin tun aia tha zawka enkawl a nih chuan loneitute tan malsawmna a la nih ngei a beisei thu a sawi lang bawk.
Dr. S. Arulraj hian nimin khan Kolasib District-a Oil Palm chinna hmun tlawhin Mizoram-a Oil Palm dinhmun a rawn en a, All India Coordinated Research Project tihna atan Mizoramah hian ram remchang 20 hectare a awm theih dawn leh dawn loh a rawn en thli thlai a. He Research Project hi din a nih chuan Oil Palm chi siam chhuahna atana tangkai Parent Materials te Mizoramah lakluh a, inthlah pun (cloning) tira Mizorama Oil Palm chingtute tan Oil Palm chi (Sprouts)-a intodelh theih nan leh Mizoramah ngei Oil Palm chi tihpun a nih theih nana hmalakna tur a ni. Hemi atana sum mamawh tur atanga sum hmahruai cheng nuai 75 chu ICAR, Government of India chuan a ruahman sa tawh a ni.
