No.7748/2020-2021

Aizawl, the 9th March 2021 : Zonet Local Cable Television Chanchinthar, ni 6.3.2021 (inrinni) zana chhuak ah, Serchhip Bial bye-election neih tur atana Congress Party candidate zahawm tak Pu P.C.Laldansanga'n Thenzawla Serchhip West Block Congress Upa Wing te nen an in kawmho naah, Old Age Pension dawngtu Kum 80 chunglam ten Rs. 3000/- leh Kum 80 hnuai lam ten Rs. 1500/- dawng thin ni a sawiin, he pension pawisa hi sawrkarin pe kim lovin Rs. 3000/- dawng thin te hnenah Rs. 200/- zel lak then sakin Rs. 2800/- theuh pein leh Rs. 1500/- dawng te hnenah Rs. 100/- zel lak thensakin Rs. 1400/- sem chhuah niin a sawi ti a puan a ni.

He thilah hian mipui hriatah thudik tak tarlan ngai niin Social Welfare & Tribal Affairs Department chuan a hnuaia Thudik chu hetiang hi a ni :-

Old Age Pension kan tih hi Ministry of Rural Development, Govt, of India chuan National Social Assistance Programme (NSAP) hnuaiah kum 60 — 79 leh kum 80 chin chunglam te tan Indira Gandhi National Old Age Pension Scheme (IGNOAPS) kaltlangin a pe a. He scheme hnuaiah hian sawrkar laipuiin pension a pek piahlamah State sorkar chuan pek chin a nei ve a. Hetiangin :

Ministry of Rural Development, Govt. of India atanga sum hmuh ang zelin sem chhuah thin a ni a. Tum khatah thla 6 atan te, thla 4 atan tein sem chhuah a ni thin.

Tun dinhmunah Central Share hi Serchhip District bikah July, 2020 thleng sem tawh niin, State share hi September, 2020 thleng sem tawh a ni. Central Share hi August 2020 atanga October, 2020 thleng sem theih maia peih fel tep ani a. December, 2020 thleng pek theih nan sanction tura buatsaih mek a ni bawk. Hemi bakah hian Pradhan Mantri Garib Kalyan Yojana (PMGKY) hnuaiah, COVID-19 hrileng avanga chhawmdawlna a tan Central sawrkarin Old Age Pension dawngtu te hnenah Rs. 1000/- theuh a pek pawh sem tawh a ni.

Old Age Pension Scheme hnuaia pension dawngtu tur ten an dawn tura Ministry leh State Sawrkarin a tih zat hi vawikhatmah lak thensak ni lovin a kim thlapa pek zel a ni.