Mizoram sorkara Vigilance Department buatsaihin vawiin khan Administrative Head of Department/Service Controllig Authroity te tan ‘Training on Online Submission of property Return’ neih a ni a, he hun hi Chief Secretary Pu Lalmalsawm’n a hmanpui.

Vawiina training Vigilance Department Under Secretary Pi Lalmuanpuii kaihhruaiah Chief Secretary Pu Lalmalsawma chuan kum 2016 khan Vigilance Deaprtment-a Online Property Return thehluh theih tura ruahmanna DPR, Mizoram State e-Governance Society-in a siam chu pawm a ni a, Vigilance Department nen thawhhona tha tak hnuaiah meeting-cum-demonstration vawi 3 lai neih a nih thu a sawi a. He software hi a sum zawnga chhut chuan a enkawl zuina tura sum senso ngaite nen a vaiin cheng 5,85,62,360/- man lai a ni a, mahse Mizoram State e-Governance Society-in a thlawn liau liauin a siam sak avangin lawmthu a sawi bawk. Chief Secretary chuan Property Return leh PAR te a hun taka thehluh lamah sorkar hnathawkte an inthlahdah thin deuha a hriat thu a sawi a, service leh kaisanna tura thil pawimawhte a nih avangin ngai pawimawh turin a chah.

Vigilance Department-in Online-a Property Return thehluh buaipui turin Officer leh Dealing Assistant te dawhkanah Computer thar a chhawp vek tawh a, NIC atangin Internet pawh hruipuia thlun zawmin, 300mbps-ah an upgrade sak tawh a ni. URL (www.propertyreturns.mizoram.gov.in) ah hian Mizoram sorkar hnuaia Group A leh B (Gazetted) te chuan an property return an thehlut thei tawh dawn a. Hei bakah hian Mobile App pawh siam a ni a, download-na tur pawh website-ah hian a link dah a ni. He web address-a luh hian registration atanga property return file dan kimchang video link Mizo tawnga siam dah a ni a, he video en tan chuan property return file chungchangah harsatna a awm lo tura ngaih a ni.