Vawiin khan MEDMOC hnuaia ‘Agri-Business Solution Training’ nikhat awh chu Aijal Club-ah neih a ni a. Training hi UNDP leh Mission Organic Mizoram tangkawp buatsaih a ni.

Training hawngtu Agriculture Director (Crop Husbandry), Pu J. Lalzamliana chuan Organic Agriculture Business puala training buatsaih a ni chu lawmawm a tih thu a sawi a. Buh-ah chauh intodelh tum lovin sum chang thlai dang chin a pawimawh a, he lama hmalatu entrepreneur an awm hi a tangkai hle a ni, a ti a. Thahnemngai taka thawk turin kalkhawmte chu a fuih a. Kan thar chhuah hlawk zawka hralh a nih theih nan market tha tak thlunzawm a ngai a ni, a ti a. Thlai chingtuten vawi lehkhata hlawkna ringawt um lovin, hun rei zawk daih tur ngaihtuah a, private entrepreneur-te nena inthlunzawm hi a pawimawh hle a ni, a ti a. Kuthnathawktuten retheihna atanga inkhai chhuahna tur atana hmalakna theihtawp chhuah turin kalkhawmte a chah a ni.

Agriculture Joint Director (Technical) leh Mission Organic Mizoram Director ni bawk, Dr. H. Saithantluanga chuan thu sawiin  agriculture business a lut tur thalaite chu an pawimawh em em a ni, a ti a. Mizote hian organic agriculture hmangin hming i chher ang u tiin kalkhawmte chu a fuih a ni.

Mission Organic Mizoram hnuaiah hian loneitu 5,000 vel awmin ram hectare 400 chuangah hma lak mek a ni a. Plan mumal tak awmin thlai thar chhuah a ni atanga sawngbawl dan leh hmun him zawka zawrh chhuah dan tur thlengin ruahmanna siam lawk a ni.

MEDMOC  Expert Member Pu Rinzuala chuan training hi a kaihruai a. Private Entrepreneur bakah kuthnathawktu thlan bik mi 50 vel telin sawihona hun neih nghal a ni a. Chawhnu lamah training hi chhunzawm leh a ni. Training-ah hian UN Marketing Force Member, Mizoram-ten Mizoram chhunga sumdawnna inkhaidiat chhawn dan presentation hmangin zirtirna an pe a, organic thlai lama tawnhriat lo nei tawh Pu Mark Lalduhsaka’n business kalpui dan a zirtir bawk a ni.