No.853/2021-2022
Aizawl 8th June 2021: Covid-19 hripui leng avangin mi tam takin nunna an chan tawh a. Covid-19 positive zinga a na zualte mamawh ber thin pakhat chu Medical Oxygen hi a ni.
Covid-19 case a san chhoh ang zelin Oxygen mamawhna a sang chho zel dawn a. Mamawh huna hman tur hnianghnar a awm theih nan Sorkar a inpuahchah a. PSA Oxygen Generation Plant bun belh tur bakah Oxygen Concentrator leh Cylinder engemawzat tanpuina dawn a ni tawh a ni.
Drugs & Cosmetics Rules, 1945 hnuaia Oxygen Manufacturing Plant Mizoramin a neih pali (4)-te dinhmun a pawimawh zual ta hle a. Oxygen tam zawk siam chhuak turin tan an la mek zel a ni. Heng Manufacturer-te Cylinder neih leh, Sorkar leh Private Hospital Cylinder neih belhkhawm hi a thahnem tawk viau a. Manufacturer-te filling capacity enin, Oxygen mamawhna lo sang ta deuh pawh ni se a thlaphan awm lo tura ngaih a ni.
Heng hun harsa karah hian sumdawnna fello kalpui duh an awm thuai thin a. Cylinder chheprelh duhna leh a man tova hralh ruk duhnate a thleng thei a, chutiang chu tuman a thlen kan phal tur a ni lo. Mizoram sorkar hmalakna leh hriatpuina a nih loh chuan mimalin rampawn emaw, state dang emaw aţanga Oxygen Cylinder lak luh loh hi a him ber a ni.
Pharmaceutical gas hi chi hrang hrang a awm a, a dahna Cylinder rawng thliarhran vek a ni. India ramah chuan Bureau of Indian Standards (BIS) hi kan hman tur a ni a. BIS in Oxygen Cylinder rawng a bituk chu - a tak (body) dum, a chung kual (shoulder) var a ni. Ram hrang hrangin Cylinder Colour Code hrang an neih thin avangin ram dang aţanga lo lut Oxygen Cylinder chuan rawng dang daih a pu thin a, Oxygen a ni ngei em tih hriatchian a har tawh ţhin a ni. Hei hi fimkhur a ngaihna em em pakhat a ni.
Mamawhna a san lai tak hi product tha lo (Spurious/Substandard) laka fimkhur a tul hun a ni thin a, mitin fimkhur tura ngen an ni.
