No.667/2021-2022
Dated Champhai, the 24th May, 2021: Deputy Commissioner & Chairman, Champhai District Disaster Management Authority, Pi Maria C.T Zuali chuan vawiin chawhnu khan mipuite hriat leh zawm tur thuchhuah siamin, Covid-19 hrileng avanga damlo thenkhatah Oxygen hman ngai a nih avangin ramri kana Oxygen Cylinder ni ngeia rin lakluhte pawh a awm tak hial thu a tarlang a. Mipuite an himna tur leh bumna an tawh loh nan Medical Gas Cylinder chi hrang hrangte leh hriat hran dan rawng hmanga entirna colour code, Indian Standard for Colour Identification of Gas Cylinders and Related Equipments Intended for Medical Use in a sawite mipuite hriat turin hetiang hian a chhuah:
Sl No | Gas Cylinder | IS 3933-1966 Valve (a nghawng) | Body (a taksa) |
1. | Air | White & Black (a var leh a dum) | - |
2. | Carbon dioxide | Grey (vutbuak) | Grey (vutbuak) |
3. | Cyclopropane | Orange (serthlum rawng) | Orange (serthlum rawng) |
4. | Ethylene | Violet (nainawk rawng) | Violet (nainawk rawng) |
5. | Helium | Brown (a uk, sen-uk) | Brown (a uk, sen-uk) |
6. | Oxygen leh Carbon dioxide inpawlh | White & Grey (a var leh vutbuak) | - |
7. | Oxygen leh Helium inpawlh | Black (a dum) | Grey (vutbuak)
|
8. | Nitrous oxide | Blue (a pawl) | Blue (a pawl) |
9. | Oxygen | White (a var), Oxygen tih emaw, a symbol 02 a chuang tur a ni | Black (a dum) |
District Magistrate chuan Oxygen Cylinder emaw ti a Industrial Gas Cylinder-te hman palh a awm theih thu leh, Industrial Cylinder-in Covid-19 natna behbawm natna hlauhawm tak Black Fungus (Mucormycosis) a thlen thei ni a hriat a nih thu chhuahin, District mipuite chu fimkhur turin a chah a. Indian Pharmacopoeia (IP) 2010 in Medical Oxygen nihphung a tarlan hrang hrang a tarlan;
1. Mihring tana a him a ni tih lantirna a chuang tur a ni.
2. Oxygen 99%V/V aiin a tlem tur a ni lo.
3. Carbon monoxide awmzat 5 ppm aiin a tam tur a ni lo.
4. Carbon dioxide awmzat 300 ppm aiin a tam tur a nilo.
5. Halogens leh Polymers te lakah a fihlim tur a ni.
6. Oxidizing subtances lakah a fihlim tur a ni.
7. Hnawng (moistures) a pai zat chu 67 ppm % aiin a tam tur a nilo, tihte chu ngaipawimawha hetianga 'certified' thlap ni lo, Oxygen Cylinder ni a ngaih hmanin vanduaina nasa zawk a thlen theih avangin Oxygen Cylinder hman tur thlan kawngah kan fimkhur a ngai hle a ni, a ti.
Ramri kaltlanga sawrkar hriatpui lova Gas Cylinder (oxygen cylinder ni a chhal) lakluh chu Oxygen Cylinder ngei a ni tih finfiahna engmah a chuan loh avangin lei loh a him ber a ni tiin, Mizoramah Oxygen mamawh khawp kan la neih avangin buaina tur a awm lova, Oxygen Cylinder mamawhna leh damlohna avang ni lova chheprelh hi dan kalh a ni, a ti bawk.
Thuchhuah chuan Oxygen Cylinder chu Drugs and Cosmetics Act 1940 & Rules 1945 hnuaiah khuahkhirh tlat a nih thu leh, State Drugs Controller atanga phalna neilo chuan a siam, zawrh leh semchhuah phal loh a nih thute, ramri kana Oxygen Cylinder lakluh chu Sawrkar laipui thuneihna hnuaia awm a nih thu a tarlang a. District Magistrate chuan phalna nei lova Oxygen Cylinder phur/ zuar/ semte chuan Section 18 (c) of Drugs and Cosmetics Act, 1940 an bawhchhiat thu leh hremna chu cheng nuaikhat chawi leh lungin kum 3-5 thleng tan theihna a nih thu a sawi lang bawk a ni.
