Nimin (14.12.2018) khan ATMA Aizawl District chuan Bawltephul Zau, Lamchhip ah Farmers Scientist Interaction cum Kishan Gosthis an hmang. He hunah hian pangang khawi thin leh Sangha Dil siam a eizawng Loneitu thahnem tak an kalkhawm a ni.

He programme-ah hian Sericulture farmer te hnenah pangngang khawina a natna awm thei, a enkawl dan leh hlawk zawka an tharchhuah theih nan a inzirtirna leh taka entirna, practical demonstration neihpui a ni a. Sangha Dil siam te hnena Induced breeding (A chi chhuah dan) leh enkawl dan te zirtir in practical demonstration neih pui an ni bawk.

He programme hi Dr. H. Lalpanmawia, Project Director Aizawl District chuan kaihruaiin ATMA Aizawl District chuan Sector hrang hrang hnuaia loneitute hmasawnnan a thawh thin thu leh Line Department hrang hrang leh KVK te tan pawh a thawhho na tha zawk a awm theih nana dawhkan tha tak a nih thu a sawi. ATMA hian Loneitute hmasawn nana an harsatna te hmachhawn dan zirtir te, thiamna thar leh tha zawk zirtira a chhawpchhuah sak thin thu leh hma an la lak zel tur thu a sawi bawk.

Training programme hi Dr.H.Saithantluanga, State Nodal Officer ATMA leh Director of Agriculture, Research and Extention, Pu. Lalrochhara District Fisheries Development Officer, Pu. Lalnunzira, Sericulture Extension Officer leh KVK, CAU atangin Scientist ten an hmanpui a. He hunah hian eizawn nan a pangngang khawitu leh Sangha Dil siam te, ATMA Aizawl District, District Sericulture Office, District Fisheries Office, Directorate of Agriculture R&E a mithiamte bakah KVK, CAU a Scientist te nen mi 70 vel an kalkhawm.