Population Stabilization Fortnight 2017 Programme kal zelah vawiin khan Parliamentary Secretary Col.Z.S.Zuala chuan Urban Primary Health Centre, ITI Veng-ah ‘Chhungkaw Hmasawnna Mela’ a hawng.
‘Chhungkaw Hmasawnna Mela’ hawnna inkhawm Chief Medical Officer, Aizawl 'E' Dr.C.Lalzepuii kaihhruaiah Khuallian Col.Z.S.Zuala chuan nu raipuarte pawhin a hun taka inentir a, nu leh naute hriselna tur ngai pawimawh a, mithiamte thu ngaichang thin turin a chah a. Nu te chuan nau hnute pek pawh naute thla 6 atanga kum 2 an nih thleng pek an ngai pawimawh tur a ni a ti. Damlo inenkawlna chungchangah Mizoram sorkarin Health Care Scheme hmanga a tul angte a buaipui sak theih thu sawiin hengte hi mipuiten hmang tangkai thiam se a duh thu a sawi bawk.
District Family Welfare & Medical Officer, Aizawl East Dr.CH.Laldinpuia chuan family planning chungchang leh invenna chi hrang hrang hmandan uluk takin a hrilhfiah a. Indanna emaw insiam emaw tih dawn reng rengin fimkhur tur leh mithiamte rawn thin a, chhungkaw dinhmun mila fa nei thiam turin kalkhawm nu leh pate a fuih bawk a ni.
He programme-ah hian Art & Culture Department-in ‘Chhungkaw Hmasawnna’ tih lemchan an entir a. Senior Medical Officer, Aizawl East Dr.Lalparliani chuan lawmthu sawiin hun a khar hnuah ITI Veng atanga kalkhawmte tan Counselling hun buatsaih zui nghal a ni.
