No.5319/2020-2021

Vawiin Ni 22,9.2020 Thawhlehni khan Parliament Monsoon Session Ni 9 na neih a ni a, Mizoram Rajya Sabha M.P Pu K.Vanlalvena chuan Mizoram chhung Myanmar ramri hnaih Champhai District leh Serchhip District khaw thenkhata lirnghing chanchin a sawi chhuak a ni. Pu K.Vanlalvena chuan kum-in 2020 chhungin Mizoramah vawi 100 aia tam lir a nghin tawh thu House-ah hian sawiin, July thla-ah Oath taking nei tura Delhi a kal tumah Ministry of Earth Sciences Secretary Dr.M. Rajeevan a hmuh thu te, Dr. M. Rajeevan a hnenah Mizoram a Investigation Team tir tura ngenna a lo thehluh tawh thu te leh tun thlenga chhanna a la hmuh loh avanga a hriatthiam loh thu te Parliament House-ah hian a sawi bawk a ni.

MP Pu K. Vanlalvena chuan Mizorama lirnghing ang zat hi State dangah thleng nise tun ang hian sawrkar laipui chuan a ngaihthah lovang tih Mizoram mipuiten an rin thu a sawi lang bawk a ni.

Pu Vanlalvena, Rajya Sabha M.P. chuan Ministry of Home Affairs leh Earth Sciences hnenah ngenna pali a thlen a, chungte chu:

1. A rang thei ang bera Investigation team Mizorama tir lut turin.
2. Lirnghing tuar tute hnena compensation pe turin.
3. Lirnghing tuartute hnena an tawm hulna tur pe turin.
4. Mizoram hnenah Lirnghing zirna hmanrua pe turin.