1383/2024-2025

31st July, 2024: Parliament Session kal lai mekah Pu K. Vanlalvena'n nimin ni 30.7.2024 tlai khan Union Budget sawihona hunah Mizoram chu North East state 8-te zingah Assam tih lohah chuan MORTH hnuaia motor kawngpui siamna atana budget chang tam ber a ni chu lawmawm a tih thu a sawi chhuak.

Pu Vena'n House a hrilh danin Ministry of Road Transport and Highway-in North East state hrang hrangte tana National Highway siamna tura sawrkar laipui sum ruahman dan chu hetiang hi a ni :- Arunachal - cheng vaibelchhe 5327, Assam - cheng vaibelchhe 34,198, Manipur - cheng vaibelchhe 13,779, Meghalaya - cheng vaibelchhe 7219, Mizoram- cheng vaibelchhe 16,606, Nagaland - cheng vaibelchhe 10,643, Sikkim - cheng vaibelchhe 4494, Tripura - cheng vaibelchhe 5106. A vaiin North East tan Cheng vaibelchhe 97,372 a nih thu a sawi a. Mizoram chu North East-a National Highway siamna tur fund pek tam ber dawttu a nih avangin lawmthu a sawi.

Pu Vena chuan Mizoram chu tlangram a nih avangin inkalpawh nan rail kawngte, lawng kawngte aiin Motor kawngpui ṭha chu mamawh ber a nih thu a sawi chhuak a. Hemi atana Central sawrkara Ministry of Road Transport and Highway-in Mizoram hmun hrang hranga Two Lane Road an siam mek te, Aizawl by-pass road siamna turte, Silchar to Aizawl Four-Lane road siamna tur te, Zorinpui to Lawngmasu National Higway atana puan thar te, Saitual to Tuivai kawng te, Lunglei to Tlabung kawng atana budget-a cheng vaibelchhe 16,606 dah a ni chu lawmawm a tih thu a sawi.

Tun hmaa darkar 14  chhung tlan thinna Aizawl to Tuipang chu tunah chuan darkar 8 a thlen theih tawh thu te, darkar 10 hman thinna Aizawl to Champhai pawh darkar 5 ah thlen theih tawh thute sawi chhuakin; hei hi Mizoram tana hmasawnna ropui tak a nih thu a sawi lang  bawk a ni.