No.3383/2021-2022
Aizawl, 14th December, 2021 : India ram rorel khawl sang ber Parliament thlasik thutkhawm, New Delhi-a neih mekah Rajya Sabha MP Pu K.Vanlalvena chuan Myanmar Refugee te chungchang a sawi chhuak.

Myanmar Sipai ten mipuite thuneihna an chhuhsak avangin Myanmar raltlan sing khat sang nga vel Mizoramah an awm mek thu Pu Vena chuan Parliament House a hrilh a. Heng raltlante hi Mizoram hmun hrang hrangah awm darhin thenkhat chu an chhungkhat lainate hnena an chen thu te, a tam zawk erawh chu Mizoram sawrkar leh NGO tang kawp ten an sak Refugee Camp khaw 15 velah an chen mek thu a sawi chhuak bawk a ni.

Pu K. Vanlalvena chuan Myanmar atanga raltlante te hi Mizoram sawrkar, tlawmngai pawl, kohhran, political party leh mimal tin ten hmangaih takin kan chhawmdawlin an mamawh chi hrang hrang chaw, tui in tur, damdawi, silhfen, chenna in leh naupang school kalna thlengin Central sawrkar tanpuina tel lovin COVID-19 hripui leng karah Mizoram in kan pek thu a sawi chhuak bawk a ni.

India ram chu Refugee te tanpui tura intiamkam ram ni ve lo mahse khawvela democracy ram lian ber kan nih avangin kan thenawm rama Democracy duh tute tanpui hi kan tihmakmawh a nih thu Pu K.Vanlalvena chuan a sawi a ni.

Attachment

  • Loading attachment...