Vawiin tlai dar 3 : 00 PM khan Paliamentary Secretary Pu Joseph Lalhimpuia hovin a office-ah School Education Department leh Information Communication Technology Department hotulu leh senior officer te chuan Information Technology tangkai zawk a School Education Department tana hman theihna tur ruahmanna an duan thenkhat te an sawiho, chak taka hma lak an rel bawk. He meeting-ah hian World Bank atanga lokal mithiam pahnih te pawh an tel a ni. Anni bakah hian SSA leh RMSA hotute pawh an tel.

Pu Joseph Lalhimpuia chuan Information Technology hmanga ICT Department nen thawhho a School Education Department inrelbawlna chu tun aia tha leh changtlun zawka siam a nih tum thusawiin, a hlawhtling chhoh hunah chuan School Education Department chuan bung thar a kai chhovin, Department hmel thar a lang thei dawn a ni, a ti.

Tun hnaia social media peng pakhat Facebook hnuaia group pakhata zirlai mipa naupangin a zirlai pui hmeichhe naupangte chunga hleihlenna tarlan a ni chu pawi a tih thusawiin hemi chungchangah hian FIR thehluh a ni tawh a, a tul ang action lak tum a ni, a ti a. Hindi School thenkat ten tunhnaia scholarship leh certificate chungchangah thil dik lo leh dan kalha an tih chu chhui chiang tur hian hemi chungchangah a pawh hian FIR thehluh a ni tawh a, thil diklo titu te chu Dan anga an chhunga action lak a ni ang, a ti bawk.

Meeting-ah hian ICT Department puihna in sikul, zirtirtu leh zirlaite chanchin dahkhawmna leh awlsam zawka engtik lai pawha en theihna tur software project School Mapping leh Child Tracking an buaipui mek chungchang sawiho niin he thil hi thla 4 chhung chuan an zawhfel theih beisei thu tarlan a ni a. Hemi bakah hian ICT Department-in cheng vaibelchhe 72 hu World Bank Project ‘Improvement of Government’s administrative processes and quality of service delivery mechanism in Mizoram’ tih an hmuh hnuaia hmalak theih dan tur kawng hrang hrang leh School Education Department tih changtlun theih dan kawng te chu zau takin an sawiho bawk a ni.