Vawiin khan Parliamentary Secretary Lt. Col. Z.S. Zuala hovin Vanapa Hall-ah Mizoram Veteran Multipurpose co-operative Society General Assembly hman a ni.

Mizoram Veteran Multipurpose Co-operative Society chu Ex-Servicemen leh sipai boral tawh te kalsan hmeithai ten Sorkar Laipui atanga hamthatna an neih te chhawm nungtu pawl, mi harsa zawk leh hmeithai te chhawmdawlna tur kawng hrang hranga daptu pawl an nih thu Parliamentary Secretary chuan a sawi a. Chutianga chhawmdawlna hna thawk tur chuan MVMC Society hian sumdawnna hrang hrang a kalpui thin a, eirawngbawlna gas agency te, CSD Canteen te bakah sangha leh artui lama sumdawnna thlengin kalpui tum a nih thu Lt. Col.Z.S.Zuala chuan a tarlang.

MVMCS General Assembly, an Chairman Col. John Zama’n a kaihruaiah hian Mizoram Youth Commission Chairman, Capt Hmingdailova Khiangte, IPS (Rtd.) chu khualzahawm a ni a. Mizoram Ex-servicemen League President Col.L.C. Sailo chuan kalkhawm te lawmna thu a sawi a, MVMCS Treasurer Capt.R.L. Ngurchhuana’n an pawl sum dinhmun a report a, an pawl Vice Chairman Hony.Capt.Ngurtaikhuma’n lawmthu sawiin hun hnung a khar a ni.