Parliamentary Secretary Lt.Col.Z.S.Zuala chuan ni hnih cham turin vawiin khan Mamit district chhunga a department enkawl hrang hrangte a tlawh kual.

Parliamentary Secretary hian District Jail sak mek chu tlawh hmasa berin, luah mai theih tura hmalak dan tur te a en a. District Jail bakah District Agriculture Office, District Excise Office, Mamit S.P Office leh DRDA Office te tlawhin, District Officer ten an harsatna leh an hmalakna ti thuanawptu sutkian dan tur te an lo sawipui a ni. Hei bakah hian 4th IR Battallion hmun tlawhin, an ralthuam neihdan leh an dinhmun te a en bawk. District Officer ten tha taka hna an thawk chu lawmawm a tih thu Parliamentary Secretary chuan a sawi.

Parliamentary Secretary hian naktuk lam hian Kanhmun lam a pan ang a, Reang (Bru) te awmna leh dinhmun bakah 4th IR Post te a en dawn a ni.

Parliamentary Secretary Lt. Col. Z.S.Zuala hi Home, Excise & Narcotics, Agriculture & Rural Development Department changtu minister puitu a nih ang a heng department hrang hrang tlawha kal a ni.