Vawiin hian Parliamentary Secretary for Education, Joseph Lalhimpuia leh Parliamentary Secretary for Higher & Technical Education, Pu H. Zothangliana te hovin DC Conference Hall ah Lawngtlai District Education Committee an thukhawm.

Thusawiin Pu Joseph Lalhimpuia chuan Mizoramah ziak leh chhiar thiam tamna rate beisei angin a thang tha tawk lova, ram pum huapa kan dinhmun tha tak ni thin pawh khan tlakhniam lam a pan ta deuh, hetiang dinhmuna kan din nachhan pakhat chu Lawngtlai District-ah kan hnufum deuh vang a ni. Hei vang hian nasa zawka tan lak kan mamawh a, Adult Education lamah pawh tun aia chak zawka hma kan lak a tul hle a ni a ti. Education Department hmalaknate chak zawka kalpui zel a ni a, SSA leh RMSA hnuaia District hrang hrangte hmalakna pawh endik hna pawh tun aia tha zawk leh fir zawka kalpui a ni tawh dawn a ni a ti. School zawng zawngah tam zawka Information Technology lam uar zawka kalpui a ni dawn a ni a ti bawk.

Pu H. Zothangliana pawhin thusawiin Lawngtlai District-a ziak leh chhiar thiamna rate a hnufum deuh bik chhan nia a hriatte tarlangin nasa zawka beihpui kan thlak a tul zia a sawi a, SSA leh RMSA a thawktute chu fak tlak leh chawimawi tlaka hnathawka thangtharte hmakhawsuih tiengtu an nih zia hrereng turin a fuih bawk a ni.

Vawiina District Education Committee neih hi SSA leh RMSA pahnihte kaihfina (Extended Joint Meeting) neih niin, District Bawrhsap Pu J. Hmingthanmawia’n a kaihruai a ni.