Lunglei-a cham mek Parliamentary Secretary( Industries) Pu Joseph Lalhimpuia chuan vawiin khan District Industrial Centre leh Industries Office, Lunglei a tlawh.

DIC General Manager Pu Lalnuntluanga kaihhruai meeting-ah Lunglei District huamchhunga Industries department mamawh leh harsatna tawh hrang hrangte Parliamentary Secretary hnenah an thlen chu Pu Joseph Lalhimpuia chuan a theih ang anga lo bawhzui a tum thu a hrilh a ni. Pu Joseph Lalhimpuia chuan Department Officer leh staff-te thahnem ngai taka an thawhnaah a fak a, mipui tana dawr nuam leh tangkai ni turin a chah bawk a ni. DIC, Lunglei hnuaiah hian Skill Development Centre sakna hmun tur (Weaving Centre ni thin), Chanmari-I a mi chu Parliamentary Secretary chuan a tlawh nghal a, a rang thei ang bera Centre thar tur sak a ni ang tih a sawi.

Hemi hnu hian Lunglawn-a Industries Department ram, CFC leh Weaving Training Centre awmna a tlawh leh a; Centre chu chak zawk leh changtlung zawka thuamthat nan hmalak a nih tur thu a sawi bawk. Pu Joseph Lalhimpuia, Parliamentary Secretary hi Industries Department Joint Director, Pi R.Lalrodingi-in a tawiawm a ni.