Vawiin Dt. 27.10.2016(Ningani) chawhma dar 11:00 am khan Mizo Zirlai Pawl(MZP) General Headquarters buatsaihin ‘Zirlaite Ni’ vawi 10-na, Lal Thanhawla Auditorium, Treasury, Aizawl-ah hman a ni a,School Education changtu Parliamentary Secretary Pu Joseph Lalhimpuia’n khuallian niin a hmanpui a ni.

Khuallian Pu Joseph Lalhimpuia chuan kum 100 liamta lawkah Zosap Missionary ten A, AW, B min siamsak a, tunah erawh khaw tinah zirna in kan lo nei ta a, hma nasa taka sawnin Mizoramah Zirlaite puala ni bik ‘Zirlaite Ni’ vawi 10-na kan hmang thei ta hial chu lawmawm a tih thu a sawi. Pu Joseph Lalhimpuia chuan Mizo Zirlai Pawl(MZP) General Headquarters-in Zirlaite Ni puala programme a buatsaih chu lawmawm a tih thu leh MZP chu sorkar bengvartu, finchhuahtu leh tanpuitu an ni a, sorkar tan an tangkai hle a ni, a ti.

Pu Joseph Lalhimpuia chuan Zirlaite Ni puala theme hrang hrang- Career guidance programme te, Zuk leh hmuam thatlohzia inzirtirna te, HIV/AIDS and Drug Awareness te, Aia upa zah leh taihmak pawimawhzia inzirtirna te neih thin a ni chu lawmawm a tih thu leh inelna, intlansiakna, intihsiakna khawvelah kan awm tawh avangin a thei apiang leh a fit apiangte , a thawkrim apiangte an din chan zel tawh avangin theihtawp chhuah turin ‘ Zirlaite Ni’ hmangtu zirlai kalkhawmte chu a chah a; ruihhlo leh zuk leh hmuam-ahte inthiarfihlima hmalam hun eng an neih theihna tura intuaihriam sauh sauh tura fuihin tumruhna leh taihmakna nena an beih phawt chuan hlawhtlinna an neih ngei tur thu a sawi. Kan pi leh pute hunah rinawmna leh taihmakna an nei nasa a, Mizoram pawnlamah pawh Mizote chu hnam rinawm leh taima niin min hre thin. Kan pi leh pute nun dan chhawm nunga aia upa zah nun, nun tlawm nei chungin Pathianin Talent tha tak tak min pekte kan ram leh kan hnam tan tipunga taima leh rim taka thawk turin zirlaite chu a chah a ni.

Mizo Zirlai Pawl (MZP) hi kum 1935 October ni 27 khan din tan a ni a, vawiin hi a kum 81-na a ni a, hemi ni denchhen hian kum 2006 atang khan MZP bultumin Zirlaite Ni hi kumtin hman thin a lo ni ta a ni.

Vawiin’ Zirlaite Ni’ hmannaah hian Govt. J.L Higher Secondary School, Govt. Mamawii Higher Secondary School, Springfield Higher Secondary School, Tiny Tots School leh Brighter Higher Secondary School atangin zirlai leh zirtirtu thahnem tak an tel a ni.