Vawiin zing dar 10.00 khan Parliamentray Secretary Pu Lal Thanzara chuan Mizoram University buatsaih –Innovation in Science Pursuit for Inspired Research (Thatho lehzuala Research ti tura Science kalphung tharte) tih thupui hmanga ni nga awh tur Third Science Camp chu MZU Multipurpose Hall, Tanhril-ah a hawng.
Pu Lal Thanzara chuan Mizoram University-in science zirlaite tana chhenfakawm tak tur Third Sciene Camp a buatsaih chu lawmawm a tih thu leh India ram hmun hrang hrang atanga scientist lokalte thahnemngaihna chu fakawm a tih thu sawiin, “Vawiina zirlaite hi in vannei tawh hle a; in awmhmunah khawvel thiamnain a um zel zawk tawh che u a ni. Chuvang chuan, hetiang hun remchang hi in lei thiam a, nangmahni tan leh kan ram tana finna in chharchhuahna a nih ngei theihna turin in rilru zawng zawng in pe tur a ni” tiin zirlaite chu a fuih a ni. Mizoram chu India rama ziak leh chhiar thiam tam lam tehnaah 3-na hauh pha a nih rualin, zirna quality tha pawchhuak tura tanlak a la ngaihzia sawiin Pu Lal Thanzara chuan, “Vawiin atanga Science camp kan neih tan tur pawh hi zirna kawnga hmasawnna mel-lung thar a nih ngei theihna turin zirlaite hian in rilru in sen a ngai a. Ngaithlatu ni satliah lova, in hriat duh apiang zawtfiah a, sawihonaah pawh inkiltawih miah lova in tel chuan thil tha in pawchhuak ngei ang” a ti. Pu Lal Thanzara chuan Mizoram university panna kawngpui chu PWD-in hnathawh theih hun hmasa berah an beisei ang ngeia thain a siamsak dawn a ni tih a puang bawk.
Third science camp hawnna inkhawma khualzahawm Prof. Somnath Dasgupta, Vice Chancellor, Assam University, Silchar pawhin zirlaite chu fuihin, “Science zirnaah hian dilchhut peihna te, thil thar ngaihtuah chhuah leh hman thiamte hi a pawimawh em em a; chutiang taka science zir tur chuan mi dangte nena ngaihdan leh hriatna inthlengtawnte hi a pawimawh em em a ni” a ti.
Third science camp hi Department of Science & Technology, Govt. of India hnuaia INSPIRE bultuma buatsaih a ni a; he camp neih chhung hian scientist-ten zirlaite chu thupui thlanbik hrang hrangah zirtirna pein, zau taka sawihona hunte neih a ni dawn a ni.
