Vawiin khan Parliamentary Secretary Pu T T Zothansanga’n Darlawn Tourist Lodge a hawng a, Tourist Lodge thar hawnna inkhawm tawite ah hian Deputy Govt. Chief Whip leh bialtu MLA ni bawk Pu R. L. Pianmawia pawh a tel a ni.

Pu T T Zothansanga chuan Tourism Department chu Mizoram hmel tidanglam thei tu nia a rin thusawiin Tourist Department kaltlanga hmasawnna awm te chu a teltu Sawrkar chang nilovin khawtlang leh mipuite an ni thei a, tourism hlawhtlinnna thui tak chu mipui te inpekna leh hawihawmnaah a innghat a, mipuiin mawh nasa tak kan nei a ni, a ti a. Phal taka Tourist Lodge sakna hmun petu Pi Lalfakzuali, Darlawn chunga lawmthu sawiin Parliamentary Secretary chuan Pi Lalfakzuali hian Darlawn hmasawnna tur atan ram a pe a, a inpekna hi midang tan a entawntlak hle a ni, a ti.

Parliamentary Secretary chuan nikum lama Inthlanpui a awm vang te, Central lama Sawrkar inthlak avangte, Planning Commission thiah anih avangte leh Planning Commission thlaktu NITI Ayog chu tunhnai maia hna an thawh tan avangte hian engemaw chen Mizoram chu a sum leh pai lamah a nghawng thusawiin Mizoram dinhmun siam thatna kawnga 14th Finance Commission chunga beiseina sang tak kan nei, a ti a. 14th Finance Commission in Mizoram tan 2015 atanga 2020 thleng vaibelchhe 12,183 a ruahman thu a sawi bawk.

Pu R.L. Pianmawia chuan Darlawn mipuiin an nghahhleh em em Tourist Lodge hawn a ni chu lawmawm a tih thusawiin Lodge sak nan a phut nei lova ram petu Pi Lalfakzuali inpekna chu a fakawm hle a ni, a ti a. Lodge sak puitlin leh hawn a anih thei nan theitawp chhuahsaktu Tourism Minister, Parliamantary Secretary leh Tourism Department-a officer te leh Darlawn khawtlang leh tlawmngai pawl hruaitu te chhunga lawmthu a sawi a. Tunmaia Tourist Lodge hlutna kan hre lo maithei a mahse hun lokal zel turah tourism hian khawtlang leh mimal hmasawnna a thlen thei niin ka hria a ni, a ti a.

Darlawn Tourist Lodge ah hian Main Building leh Cottage 2 a awm a. Main building ah hian Deluxe Room 4(Single Room leh Double Room 2 ve ve) leh Double Room 4 bakah Dormitory(khum 8 awmna) 2 a awm a. Darlawn Tourist Lodge hi Sakawrdai Destination hnuaia awmin he Destination hnuaia hian Darlawn bakah Sakawrdai, Thingsulthliah leh Khanpui ah te Tourist Lodge sakna tur ruahman a ni a. Darlawn Tourist Lodge sak nan hian cheng nuai 140.07 sen a ni.