Tukin zing khan Parliamentary Secretary leh bialtu MLA ni bawk Pu TT Zothansanga chuan MLA Fund atangin Champhai District Hospital tan Intercom a hlan. Parliamentary Secretary chuan hospital inrelbawlnaah intercom chu tangkai taka hman a nih a beisei thu leh, hospital-a indaihlohna awm te chu a hriatpui thu sawiin, a remchan dana hmalakpui a tum thu a sawi a ni.

Parliamentary Secretary chuan ration buhfai man tihsan chungchang a sawilangin, Rs. 9.50 atanga Rs. 15 a buhfai man tihsan a ni chu hi thildang man a to tawh vang mai bakah Sorkar laipuiin FCI atanga buhfai hralhchhuahna man a san zel vang a nih thu a sawi a. Sorkarin FCI atangin buhfai hi kg 1-ah Rs. 29.18 zelin a lei a (October 2013 atangin), Rs. 9.50 a hralhchhuah a nih khan sorkarin Rs. 19.68 a tum zel thin chu man tharah pawh Rs. 14.18 a la tum tho dawn a ni, a ti a. Hemi rual hian BPL (buhfai kg1 ah Rs. 3) leh AAY (buhfai kg1 ah Rs. 6.15) chhungkuate dawn thin chu tihdanglam a la nih loh thu a sawi bawk.

Pu TT Zothansanga chuan India ram hmundangte nen inkhaikhinin ration buhfai kan ei nasat thu a sawi a. Hmundangah chuan chawhrualin mipui 20-30% in an ei laiin Mizoramah chuan mipui 100% ten ration buhfai kan dawng a. Mi harsa zawkte tan thla khata kg 8 chu kham khawp a nih loh avangin, a mamawhte tan semzai a nih zawk theih nan VIP quota chu tih tawp a nih thu a sawi a. Chutihrual chuan tun aia tam buhfai dawn a nih theih nan sorkarin hma a la mek bawk a ni, a ti. Tun dinhmunah Mega Block vangin harsatna tawh a la ni hrihlo chu lawmawm a tih thu sawiin, Pu TT Zothansanga chuan harsatna a lo thlen thula inven nan buhfai chhek khawlna tur kudam 28 sakna tur NABARD atanga loan lak mek a ni, a ti bawk.

Vawiin hunah hian Champhai District Hospital a thawkte bakah media lama thawkte an tel a. Medical Superintendent chuan bialtu MLA thilpek chungah lawmthu sawiin, hospital building tharin a mamawh tam tak leh indaihlohna te ngaihsaka hotuten an hriatpuina leh hmalakpuina te chu damlote tan malsawmna a nih zel tur thu a sawi a ni.