Parliamentary Secretary Pu T.T. Zothansanga chuan, “kan thenawm state-te chuan ration buhfai an lakzat hi an tihniam nasa hle a, chutiang chuan Mizoram sorkar chuan hmalak ve a tum a ni” a ti. He thu hi nimin (6/1/2015)-a Tuipuiral Zirlai Pawlin Sesih Community Hall-a General Conference vawi 30-na an hmannaah a sawi a ni.

Pu T.T. Zothansanga chuan Tuipuiral huam chhunga kawng chei thatna tur chungchang tarlangin, Champhai chhunga khawkar kawng thenkhat siamthatna tur sum ruahman fel a nih thu a tarlang a. Tunhnaia sorkarin ration buhfai man a tihsan chungchang sawilangin, buhfaiah hian sorkarin kg. khatah Rs. 20/- dawn a hloh thin a, tuna kg. khat Rs. 15/- a a tihsan pawh hian Rs. 15/- vel a la hloh tho thu sawiin, thenawm state-te chuan ration buhfai an lakzat hi an tihniam nasa hle a, chutiang chuan Mizoram sorkar chuan hmalak ve a tum a ni, a ti bawk.

Hlawhtling tur chuan taimak a pawimawhzia sawiin Pu T.T. Zothansanga chuan, khawvel hi boruak chi hrang hrangin a tuam a, Information Technology-a hmasawnna hian awlsamna leh remchanna tam tak min siamsak laiin kawng lehlamah a tha lo zawnga kan nun kaihhruaitu a ni thei a. Ruihhlo in kan ram min run mek bawk a. Zirlaite tan chuan kan zirlai hlamchhiah a buaipui tur thil dang a tam hle a. Mahse heng zawng zawng hnuchhawn a, hlawhtlin tuma taima taka bei hram hramtute chu malsawmna dawngtute an ni, a ti.

Ni hnih awh Tuipuiral Zirlai Pawl General Conference inkhawmah hian an bial chhunga HSLC leh HSSLC-a failed nei lo school 8 te leh zirlai tithate hnenah chawimawina hlan a ni.