Parliamentary Secretary Pu Chawngtinthanga chu December 16, 2011 (Zirtawpni) atang khan Dilkhan, Thanglailung, Phullen, Phuaibuang, Khawlian, NE Tlangnuam leh Daido khua te tlawh a zin chu vawiin khan Aizawl lo thleng leh nia thu dawn a ni. Heng khaw hrang hrang a tlawh ah te hian krismas leh kumthar hlim taka an hman theih nan duhsakna leh thilpek chi hrang hrang a hlan a khaw mipuite pawhin hun chep tak kara Parliamentary Secretary in a tlawh avang leh duhsakna thilpek a hlan avangin a chungah an lawm hle nia hriat a ni.

Pu Chawngtinthanga hian Phullen leh Phuaibuang inkara Tuivai lei dawh mek chu a hmunah a tlawh a, tun thal chhung ngeia lei hi dawh zawh hman a nih theihna turin hnathawktute chu a ngen a ni. He hna en hian November thla pawh khan a lo han tlawh tawh nghe nghe a ni. Parliamentary Secretary hian Phuaibuang khua a BRGSK hnuaia building Rs. 8,73,000/- senga sak RCC building a hawng bawk. A zin chhung hian Phuaibuang leh Khawlian ah te vantlang inkhawm neih puiin Mizoram sawrkar in mipuite hamthatna tura hmasawnna kawng hrang hrang a thawh mek te a hrilh a ni.

Ruahman lawk dan in Parliamentary Secretary hian ni 21.12.2011 (nilaini) khian Sesawng-ah RMSA hnuaia High School building sak thar a hawng ang.