Nimin  ni 29.06.2020 zing dar 10:30 vel khan Pu Vanlalthlana te in chu a kanga, chhiat tawk te hi a bul hnai Hall-ah a remchang ang anga beng luh hrih an ni a. Pu Vanlalthlana te hi Tuikhurhlu a awm hmasa ber pawl niin, a nupui leh a fate 3 nen an cheng a, bungrua engmah chuh hman lovin an chenna in hi a kangral vek a ni.

P&E Minister leh 8-Tawi Bialtu MLA ni bawk Pu R.Lalzirliana'n chhiattawk te hi a hmuna vawiin chawhma khan tlawhin tanpuina a pe a, harsatna an tawh chungchangah a theih ang anga tanpui turin a inpeih thu a tarlang bawk.

Pu Vanlalthlana te In hmun hi kawngpui laih zau turin a tan tlang dawn avangin a hmun ngaihah sak a remchang tawh lo a, hemi anih avang hian hnatlanga sak nghal mai a rem lova. An in sak na tur hi khawtlang hruaitu ten Bialtu Minister rawn chhungin remchang an zawn sak dawn a ni.

Pu Vanlalthana in hi assam type building, in mal ding a ni. Pu Vanlalthana leh a nupui Pi Liansangi te hian fa pathum mipa hlir an nei a, an fa u ber hi kum 19 mi niin vawiin khan inhlawhin hmun dangah hna a thawk a, an ni nupa hi an huanah hnathawkin an feh thung. An mi lai hi vohbik niin an te ber kum 11 mi nen an chhungte in lamah an leng a, in kan lai hian tumah inah an awm lo a ni.

Pu Vanlalthlana te chhungkua hian Tuirial kamah huan lo ram an neih avangin kum 2009 khan Thingsulthliah atangin tuna an awmna Tuikhurhluah hian an pem thla a, an huanah thlai tiak nursery te siamin tunlai hian teak an kui a, vawiinah teak kui hna thawkin an feh a ni. Mi taima, khawtlang leh kohhrana inhmang tak an ni a, chhungkaw nu ber Pi Liansangi hi MHIP-ah treasurer niin MHIP pawisa a kawl ang angte leh kohhran hmeichhe rawngbawlna buhfaitham pawisa a kawlte pawh a kang fai vek a, an mahni bil pawisa pawh nuai chuang hret chu a kang niin Pi Liansangi hian a sawi a ni.

Bialtu MLA Pu R.Lalzirliana chuan In kang bul a UPC tirhkoh te Rs 6000 in a tanpui nghal bawk a ni.