No.5716/2020-2021

Aizawl, the 3rd October 2020: Vawiin chawhma khan P&E Minister Pu R.Lalzirliana, bialtu MLA ni bawk chuan Rulchawm khawchhunga leiminin chenna in a tihchhiat te a hmunah kalin a endik a. Leimin avanga in leh lo chan chhungkaw 7 hnenah tanpuina, tangka faiin Cheng Singhnih(Rs 20,000) theuh a hlan nghal a ni.

Rulchawm Village Council House a vantlang inkhawmna tawi buatsaihah P&E Minister Pu R.Lalzirliana chuan leimin avanga in leh lo chan te chu thinlung takin a tawrhpui thu a sawi a. A tul angin sawrkarin hma a la chhunzawm dawn a ni a ti. Minister chuan he vanduaina karah Mizo nunmawi - tlawmngaihna leh induhsak tawnna a lo lang erawh hmuhnawm a tih thu sawiin Rulchawm khaw mite chhiat tawhnaah hian Zonunmawi chu Mizo khawtlang nunah la vawn nun reng a nih zia a takin a hmuh theih a. Tanpui ngai te tanpuia chhawmdawl ngaite kan in tanpui thin hian Mizo nih a ti nuam thin a ni a ti. Tun dinhmunah leimin chhan chiang faka sawi theih la ni lo mahse enfiah thuai a nih tur thu a sawi a. Helai leimin dan leh a nghawng theih te chu chiang zawka la zirchian a nih tur thu te leh hmalak zel dan tur pawh sawrkarin mithiamte rawn tirin ruahmanna a siam dawn a ni a ti.

Nimin(Dt 02.10.2020) zingkar dar 7:30 bawr vela Rulchawm Field chhak leimin hian Chenna in pathum : Pu Hrangbawiha, Pu F.Kapliana leh Pi Thazeli te in a hnawl chhe nghal a. Vengchhung inkalpawhna kawngpui pawh mihring kalna tur pawh zuah lovin a ti bal nghal a. A bul hnaia chenna in 4 dang luah ngam lohin a siam nghal a. Heng in 4 te hi vawiin khan Rulchawm, Ruallung, Mualpheng, Keifang, Lenchim leh Saitual khua atanga mitlawmngai ten hnatlangin an thiat nghal a. Inkalpawhna kawngpui bal hi siamthat a nih leh theih nan Minister Pu R.Lalzirliana chuan PWD hotute a be nghal a. Minister hian leimin tihchhiat kawngpui siam that hmaa inkalpawhna a awm theih nan pumpelh kawng siamna turin Cheng Nuainga (Rs 5 Lakh) a ruahman nghal bawk a. A tul anga hman atan Silpauline 16 Rulchawm VC te hnenah hian a hlan bakah hnatlang thingpui inna atan Rs. 20,000 (Cheng Singhnih) a hlan nghal bawk a ni. Minister hi Pi Margaret Lalrinawmi Fanai, Addl DC, Saitual, Pu PC Lalduhthlanga, SP, Saitual, Pu K.Lalrinawma, BDO, Phullen leh Saitual District Official ten an tawiawm a ni.

Vawiin chawhnu lamah P&E Minister Pu R.Lalzirliana chuan Saitualah  a bial chhunga khaw 14 a chhit turin Solar Street Light 363 a sem chhuak nghal a. Pu David Ramnunsanga, Director, ZEDA leh Pu JH Malsawma, Project Director, ZEDA ten an tawiawm a ni.