Mizoram Governor chuan Mizoram (Land Revenue) Act, 2013 section 128 leh 129 te'n thuneihna a pek angin, Notification dated 24thApril, 2014 chhunzawmin hetiang hian January 31, 2019 khan Periodic Patta Renewal chungchangah thupek a chhuah:

1. Periodic Patta thi tawh tihnun chhunzawm (renew) duhte chuan dt. 30.09.2019 thleng a hnuaia tarlante behchhan hian dilna, Revenue Department Office-ah thehluh theih a ni ang:

(1) Ram chhiah leh renew-na fee te leh late fee chawi a ngai tel a nih chuan 20% of Renewal Fee (late fee atana lak) pawh pek fel tur a ni ang a.

(2) Ram chu tha taka cheibawl a ni tur a ni a.

(3) Ram awmna hmun leh a ri chungchanga buai a awm a nih chuan chinfel hmasak phawt tur.

(4) Periodic Patta renew dilna tinah (a la dam leh thi tawh pawh huamin):

(a) SAAB-in (SAAB a awm loh chuan a ram awmna bialtu Village Council emaw Local Council emawin) an hmuh dan (comment), Annexure-I a tarlan format hmanga an siam chu thiltel tur a ni a. He form hi Renew dilna form rualin Department-in a pe chhuak tel zel ang.

(b) Periodic Patta ram chu notified town/ station area chhunga awm a nih chuan Revenue Department thawktu- Surveyor/ Revenue Inspector/ Revenue Sub-Inspector/ Revenue Assistant rintlakin a ram dinhmun enfiahin, Annexure-II a tarlan format hmang hian Report siamin Office-ah a.  theh lut ang.

2. Renew phalsak theitu Revenue Officer chuan a chunga thu tarlante zawm a ni em tih ngun taka chik chungin, mumal taka ram cheibawl nia a hriata, dan ding lai bawhchhiat a neih loh chauhvin Periodic Patta chu a renew-sak ang.

3. Renew-tu tur Officer-in renew lohna tur chhan tha tawk a hriat erawh chuan a ngaihdan ziak telin Director, Land Revenue & Settlement Department kal tlangin dilna chu Sorkar-ah thlen zel tur a ni.

4. He thupek hi sut a nih loh chuan September 30, 2019 thleng a ding ang.