1236/2025-2026

Dated Aizawl, the 18th July, 2025: Vawiin khan Pi Vanlaldiki Sailo, Commissioner, Persons with Disabilities (PwD) hovin ‘Sugamya Yatra’ puala sawrkar zirna in hrang hrang endikna (Access Audit) hun hman a ni a. National Institute for Locomotor Disabilitites (NILD) aiawhte pawh an tel a, heng hmunte hi endikin siam that ngai awmte chu siamtha tura hrilh an ni.

Vawiina Sugamya Yatra puala zirna in tlawhte chu a hnuaia tarlante hi an ni - 

1.    Govt. Sihphir Higher Secondary School

2.    College of Veterinary Sciences & Animal Husbandry

3.    IGNOU Regional Centre, Aizawl

4.    Mizoram ICFAI University

5.    Govt. Primary School-II, Durtlang

Sawrkar laipui chuan India rama rualbanloten veivahna kawnga harsatna an tawh lohna turin ‘Accessible India Campaign’ (Sugamya Bharat Abhiyan) a duang a, hemi hnuaiah hian ‘Sugamya Yatra’ hi 2015 atang khan kalpui a ni a. Wheelchair hmang, mitdel leh rualbanlo dangte’n biak in, sawrkar in, zirna in leh mipui punkhawmna vantlang building hrang hrangte an thlen ve theih nan an kal theihna tur bik (Wheelchair ramp, Lift, Signage etc) siam turin thupek a chhuah a. Sugamya Yatra hi India ram pumpuiah chak taka kalpui niin, Audit Team leh rualbanlo thenkhatten hmun hrang hrang endikin hun an hmang thin a ni.

Mizoramah pawh PwD Commissioner office leh NILD tangkawpin February 21, 2025 atang khan Sugamya Yatra hi kalpui tan a ni a. Mizoram district 7-ah he campaign hi kalpui tawh niin, Mizoram pumpuiah endikna hi neih chhuah vek tum a ni.