Vawiin khan Dr Lalnunthara, Commissioner, Persons with Disability (PWD ) chuan Mamit tlawhin, DIPRO Office Chamber-ah Chanchinbumite kawmna a nei nghal.

Dr Lalnunthara, Commissioner PWD chuan pianphunga rualbanlote tan sawrkar laipui leh State sawrkar hnuaiah  ruahmanna tha tak tak siam a ni a, mizote'n rualbanlo kan tih hian tanpuina dawng tur ngawr ngawr emaw lam nilovin tih theih an nei ve em tih emaw an tih theih dapchhuah sak a ni a ti, Mamit khawpui chhunga chanchinbumite chu rualbanlote tana an hamthatna leh an nunkawng hruai tura theihtawpa thawk tlang turin a sawm a.  Zirna In, Office building sak thar mekah te rualbanlote tana inthiarna awlsam siamsak an ni em tih leh office an dawr ve theihna tura pan awlsam tura ruahmanna siamsak an ni em tihte chu enfiah turin a chah bawk a ni.

Commissioner hian rualbanlote tana sawrkar hmalakna leh humhalhna dan tarlangin The Rights of Persons with Disabilities Act 2016 hman anih atangin rualbanlo tehna chi hrang hrang 7 ni thin chu 19 ah tihpun a ni a ti. Kum 2011 census hnuhnung bera lan danin Mizorama ah rualbanlo mi 15, 160 an awm mek thu leh hamthatna leh chanvo hrang hrang an neih a tarlang bawk a ni.

Sawrkarin rualbanlo tan bika ruahmanna hrang hrang a siam a tarlan zingah hian Rualbanlo sawrkar Department hnuaia thawk ten harsatna/lungawi lohna an neih an thlenna turin Grievance Redressal Officer ruat a ni a, zirna sang zir turin 5% hauhsak an nih thu leh kum lamah kum 5 thleng ngaihhnathiam an nih tur thute, Zirna inah enhran an nih lohna tur leh infiamna lamah pawh an tih theih ang ang ngaihtuah pui an nih tur thute, Agriculture ram leh in hmun thehna kawngah 5% hauhsak an nih thute, Development programme hrang hrang retheihna umbona kawngah 5% hauhsak an nih thute leh kawng hrang hrangah dan hnuaia an chanvo neihte a tarlang a ni. Heng an hamthatna leh an chanvo neih hrang hrang awmte hi Commissioner Office ah zawhfiah theih a nih thu leh an mahni tanpuina tura ke pen kawngah zau taka an in hawn thu a sawi a bawk.

Vawin Press Conference hi Pu Paula Rokima, DIPRO Mamit leh Pi Lalrinpuii, District Programme Officer , Social Welfare, Mamit te chuan tawiawmin Mamit khawpui chhunga chanchinbumite'n zawhna hrang hrang an zawhte Commissioner hian  chhangin Kohhran hrang hrang te'n  Biakin kan sakin pianphunga rualbanlote tana kal ve theih leh kal awlsam tura ruahmanna kan siamsak a pawimawh thu a  tarlang tel bawk. 

Dr Lalnunthara, Commissioner(PWD ) hian naktuk hian Gov't High School-ah Awarness campaign School naupangte leh Mamit mipuite tan buatsaih a ni dawn a,  Mipui atam thei ang ber tawiawm turin a sawm nghal bawk a ni.

Attachment

  • Loading attachment...