India rama infiam mite chawikangtu pawimawh tak Petroleum Sports Promotion Board (PSPB) aiawhin Manager pahnih Pu Divendra Joshi leh Pu Sunil Limaya te chu nimin khan Aizawl an lo thleng a. Vawiin khan Sports Special Secretary Pu R. Vanlalvena chu a pisa-ah hmuin Aizawl-ah PSPB bultumin ‘Inter Unit Billiards & Snooker Tournament 2012’ buatsaih an duh thu an hrilh a. Special Secretary hovin a nghahna tur hmun atan Hawla Indoor Stadium, Pitarte Tlang pawh a hmunah an en ho nghal bawk a ni.
Petroleum Sports Promotion Board hian a bikin Billiards, Snooker leh Table Tennis player tam tak te an sponsor mek a. Cue Sports lama Mizo chhuanvawr Lalrina Renthlei, Tuikhuahtlang pawh kum 2011-a Chennai-ah National Junior Snooker Champion a nih khan an kaihhruaina hnuaiah an enkawl zui nghal a ni.
Ramchhung khawpui lian hrang hrangah tournament an buatsaih thin a, Mizoram nen inhmelhriatna tha zawk an neih zel theih nan kum dangah an tih ngai lo angin kumin hian Mizoram-ah October thla hun remchangah hian tournament rawn nghah an duh ta a ni. He tournament hi buatsaih a nih theih dawn chuan India ram mai ni lo, khawvel huapa lang tham players - Pankaj Advani, Kamal Chawla Divendra Joshi, Aditya Mehta, Manan Chandra, Ashok Shadilya leh a dangte - World Champion leh Asian Champion lo ni tawh leh ni lai mek te pawh an rawn tel dawn a ni.
Petroleum Sports Promotion Board hian Table Tennis lamah pawh Mizo infiammite tan hma an lo la tawh thin a, tunah hian Mizo naupang 3 - Lalrinpuia, Maubawk; Lalhunhlua, New Capital Complex leh John Zamliana, Tuikhuahtlang te an enkawl mek a ni
